കൊച്ചി: കൊച്ചിയില് പതിനഞ്ചോളം പേരടങ്ങുന്ന സംഘം വീട്ടില് കയറി ആക്രമണം നടത്തിയതായി പരാതി. എളംകുളം സ്വദേശി ദിലീപിന്റെ വീട്ടില് കയറിയാണ് ആക്രമികള് വാഹനങ്ങളും, ഗൃഹോപകരണങ്ങളും മറ്റും തല്ലിതകര്ത്തത്. സംഭവത്തില് തേവര പോലീസ് കേസെടുത്തിട്ടുണ്ട്.
പുതുവര്ഷ ആഘോഷത്തിനിടെ ആശംസ നേര്ന്നതാണ് ഒടുവില് തര്ക്കത്തില് എത്തിപ്പെട്ടത്. രാത്രി പതിനൊന്നരയോടെ വഴിയില് വച്ച് പുതുവര്ഷ ആശംസകള് നേര്ന്ന പനമ്പിളളി നഗര് സ്വദേശി കിരണിനെ എളംകുളം സ്വദേശിയായ എബിനും കൂട്ടുകാരും ചേര്ന്ന് മര്ദ്ദിച്ചത്.
തുടര്ന്ന് കണ്ണിന് അരികിലായി പരിക്കേറ്റ കിരണ് സഹായത്തിനായി എളംകുളത്തെ സുഹൃത്ത് ദിലീപിന്റെ വീട്ടിലെത്തി. കിരണിനെ ആശുപത്രിയില് കൊണ്ടുപോയശേഷം തിരികെ എത്തി വിശ്രമിക്കുമ്പോഴാണ് എബിനും സംഘവും ദിലീപിന്റെ വീട്ടിലെത്തി ആക്രമണം നടത്തിയത്.
അക്രമിസംഘം വീടിന്റെ മുന്വാതില് പൂര്ണമായി തകര്ത്തു. വീടിന്റെ എല്ലാ ജനലുകളും തകര്ത്ത നിലയിലാണ്. എളംകുളം സ്വദേശി എബിനുള്പ്പെടെയുള്ള അക്രമിസംഘത്തിനായി പോലീസ് തിരച്ചില് ശക്തമാക്കി.
Discussion about this post