തൃശൂര്‍ : സ്‌കൂട്ടറില്‍ സഞ്ചരിക്കുകയായിരുന്ന യുവതിയെ ഇടിച്ചിട്ട് നിര്‍ത്താതെ പോയ ബൈക്ക് യാത്രക്കാരനായ യുവാവ് പിടിയില്‍. തൃശ്ശൂര്‍ ജില്ലയിലെ കുന്നംകുളത്താണ് സംഭവം.
അകലാട് ഒറ്റയിനി സ്വദേശി വട്ടേക്കാട്ട് വീട്ടില്‍ സത്യന്‍ മകന്‍ സനലിനെയാണ് വടക്കേക്കാട് പൊലീസ് പിടികൂടിയത്. സംഭവം നടന്ന് മൂന്ന് മാസങ്ങള്‍ക്ക് ശേഷമാണ് ഇയാള്‍ പിടിയിലായത്.
ബൈക്കിന്റെയും പ്രതിയുടെയും സിസിടിവി ദൃശ്യങ്ങള്‍ സോഷ്യല്‍ മീഡിയകളിലും മറ്റും പ്രചരിപ്പിച്ചും 70 ഓളം ക്യാമറകള്‍ പരിശോധിച്ചും മൂന്ന് മാസമായി അന്വേഷണം നടത്തിയാണ് വടക്കേക്കാട് പൊലീസ് പ്രതിയെ പിടികൂടുന്നത്.
കുന്നംകുളം ഭാഗത്ത് നിന്നും വടക്കേക്കാട്ടേക്ക് സ്‌കൂട്ടറില്‍ യാത്ര ചെയ്യുകയായിരുന്ന സ്ത്രീയെ ബൈക്കിലെത്തിയ ഇയാള്‍ ഇടിച്ചിടുകയായിരുന്നു. ശേഷം ബൈക്ക് നിര്‍ത്താതെ പോയി.
സ്‌കൂട്ടര്‍ യാത്രക്കാരിയായ സ്ത്രീയുടെ കാലിന് അപകടത്തില്‍ പൊട്ടല്‍ ഉണ്ടായി. യുവതിയുടെ പരാതിയില്‍ കുന്നംകുളം പൊലീസ് കേസ് രജിസ്റ്റര്‍ ചെയ്ത് അന്വേഷണം നടത്തുകയായിരുന്നു.
Discussion about this post