കാസർകോട്: വീട്ടിൽ ആത്മഹത്യക്ക് ശ്രമിച്ച നഴ്സിംഗ് വിദ്യാർത്ഥിനിയുമായി ആശുപത്രിയിൽ പോവുകയായിരുന്ന കാർ മറിഞ്ഞ് പെൺകുട്ടി മരിച്ചു. കാസർകോട് ബേത്തൂർപാറയിൽ ആണ് സംഭവം.
തച്ചാര്കുണ്ട് വീട്ടില് പരേതനായ ബാബുവിന്റെ മകള് മഹിമയാണ് മരിച്ചത്. 20 വയസ്സായിരുന്നു. മഹിമയെ ഇന്ന് രാവിലെ 8 മണിയോടെയാണ് വീട്ടിലെകിടപ്പുമുറിയില് തൂങ്ങിയ നിലയിൽ കണ്ടത്.
ഉടൻ തന്നെ അമ്മ വനജയും സഹോദരന് മഹേഷും ചേർന്ന് മഹിമയെ ആശുപത്രിയിലേക്ക് കൊണ്ടുപോകുകയായിരുന്നു. അതിനിടെയാണ് ഇവർ സഞ്ചരിച്ച കാർ പടിമരുതില് വെച്ച് അപകടം സംഭവിച്ചത്.
കാർ നിയന്ത്രണംവിട്ടു മറിയുകയായിരുന്നുവെന്നാണ് ദൃക്സാക്ഷികൾ പറയുന്നത്. അപകടത്തിൽപ്പെട്ടവരെ നാട്ടുകാർ ഉടൻ തന്നെ കാസര്കോട് ചെർക്കള ആശുപത്രിയില് എത്തിച്ചിരുന്നു.
എന്നാൽ പെൺകുട്ടിയുടെ ജീവൻ രക്ഷിക്കാനായില്ല. തൂങ്ങിയതിനാലാണോ കാർ അപകടമാണോ മഹിമയുടെ മരണകാരണം എന്ന് വ്യക്തമല്ല. മഹിമയെ ആശുപത്രിയിലേക്ക് കൊണ്ടുപോകുമ്പോൾ ജീവനുണ്ടായിരുന്നു എന്നാണ് ലഭിക്കുന്ന പ്രാഥമിക വിവരം.
അപകടത്തിൽ മഹിമയുടെ അമ്മക്കും സഹോദരനും പരിക്കേറ്റിട്ടുണ്ട്. ഇവർ ചികിത്സയിലാണ്. കാസര്കോട്ടെ നുള്ളിപ്പാടിയിൽ നഴ്സിങ് വിദ്യാര്ഥിനിയായിരുന്നു മഹിമ.
Discussion about this post