കോഴിക്കോട്: നാദാപുരം വളയത്ത് വിവാഹാഘോഷത്തിനിടെ അപകടകരമായി കാറുകളോടിച്ചുള്ള റീല്സ് ചിത്രീകരണത്തില് നവവരന് ഉള്പ്പെടെയുള്ളവര്ക്കെതിരെ പോലീസ് കേസെടുത്തു. വരനായ കല്ലാച്ചി സ്വദേശി അര്ഷാദ് കൂടെയുണ്ടായിരുന്ന മറ്റ് യുവാക്കള് എന്നിവര്ക്കെതിരെയാണ് വളയം പോലീസ് കേസെടുത്തിരിക്കുന്നത്.
കഴിഞ്ഞ ദിവസമാണ് സംഭവം. വളയത്ത് വിവാഹപ്പാര്ട്ടി നടുറോഡില് നടത്തിയ വാഹനാഭ്യാസ റീല്സ് സമൂഹമാധ്യമങ്ങളില് പ്രചരിച്ചിരുന്നു. മൂന്ന് കിലോമീറ്ററോളം ദൂരം കാറുകളുടെ ഡോറില് ഇരുന്നും റോഡില് പടക്കം പൊട്ടിച്ചും പൂത്തിരി കത്തിച്ചുമായിരുന്നു ആഡംബര വാഹനങ്ങളിലെ അഭ്യാസപ്രകടനങ്ങള്.
പിന്നില് നിന്നും വന്ന ഒരു വാഹനത്തെയും ഇതിനിടയില് കടന്നുപോകാനും അനുവദിച്ചില്ല. നവവരനും ഈ പരിപാടികളില് സജീവമായി രംഗത്തുണ്ടായിരുന്നു.
അപകടകരമായി വാഹനം ഓടിക്കല്, പൊതുഗതാഗതം തടസപ്പെടുത്തല് തുടങ്ങി സ്റ്റേഷന് ജാമ്യം കിട്ടാവുന്ന വകുപ്പുകള് പ്രകാരമാണ് കേസ്. പോലീസ് സ്റ്റേഷനില് ഹാജരാകാന് ഇവര്ക്ക് നോട്ടീസ് നല്കി.
Discussion about this post