ആലപ്പുഴ: ഉച്ചഭക്ഷണത്തിന് എത്തിയപ്പോള് കുട്ടികള്ക്ക് സര്പ്രൈസ് ഒരുക്കി മന്ത്രിമാര്. വിളമ്പുകാരായി എത്തി മന്ത്രിമാരായ വി ശിവന്കുട്ടിയും സജി ചെറിയാനുമാണ് കുട്ടികള്ക്ക് കൗതുകമായത്.
ചെങ്ങന്നൂര് ഗവണ്മെന്റ് യുപിഎസ് പേരിശ്ശേരിയിലെ പൂര്ത്തിയായ കെട്ടിടത്തിന്റെ പ്രവര്ത്തന ഉദ്ഘാടനത്തിനായാണ് മന്ത്രിമാരെത്തിയത്. പരിപാടിക്കിടെയാണ് മന്ത്രിമാര് ഉച്ചഭക്ഷണം വിതരണം ചെയ്യുന്ന സ്ഥലത്തെത്തി കുട്ടികള്ക്ക് ഭക്ഷണം വിളമ്പിയത്. കുട്ടികള്ക്ക് ആദ്യം അത്ഭുതമായിരുന്നെങ്കില് പിന്നെയത് ആവേശവും ആഹ്ളാദമായി.
സ്കൂളുകളില് നല്ല ഭക്ഷണം ഉച്ചയ്ക്ക് നല്കാനാകുന്നതില് സന്തോഷമുണ്ടെന്ന് പൊതുവിദ്യാഭ്യാസം, തൊഴില് വകുപ്പുകള് കൈകാര്യം ചെയ്യുന്ന മന്ത്രി ശിവന്കുട്ടി പറഞ്ഞു. പിടിഎ, അധ്യാപകര്, നാട്ടുകാര് തുടങ്ങി ഏവരുടെയും പിന്തുണയോടെ മികച്ച രീതിയില് ഉച്ചഭക്ഷണ പദ്ധതി മുന്നോട്ട് കൊണ്ടുപോകണമെന്നും മന്ത്രി പറഞ്ഞു.
ചെങ്ങന്നൂര് മണ്ഡലത്തിലെ മുളക്കുഴ ഗവണ്മെന്റ് എല്പിഎസ്, പേരിശ്ശേരി ഗവണ്മെന്റ് യുപി സ്കൂള്, മാന്നാര് ഗവര്മെന്റ് ജെബിഎസ്, ചെന്നിത്തല ഹരിജനോദ്ധാരണി ഗവണ്മെന്റ് എല്പി സ്കൂള് എന്നിവിടങ്ങളിലെ നാല് കെട്ടിടങ്ങളുടെ പ്രവര്ത്തനോദ്ഘാടനവും ചെങ്ങന്നൂര് ഗവണ്മെന്റ് ഗേള്സ് വൊക്കേഷണല് ഹയര് സെക്കന്ററി സ്കൂളിന്റെ പുതിയ കെട്ടിടത്തിന്റെ നിര്മാണ ഉദ്ഘാടനവും മന്ത്രി വി ശിവന്കുട്ടി നിര്വഹിച്ചു. ചടങ്ങുകളില് മന്ത്രി സജി ചെറിയാന് അധ്യക്ഷനായിരുന്നു.
Discussion about this post