തിരുവനന്തപുരം: തദ്ദേശ തെരഞ്ഞെടുപ്പില് യുഡിഎഫ് വമ്പിച്ച വിജയം നേടുമെന്ന് പ്രതിപക്ഷ നേതാവ് രമേശ് ചെന്നിത്തല. ബിജെപിക്ക് കേരളത്തില് ഒരിഞ്ച് സ്ഥലം പോലും കേരളജനത കൊടുക്കില്ലെന്നും യുഡിഎഫിലാണ് ജനങ്ങളുടെ പ്രതീക്ഷ മുഴുവനെന്നും ആ പ്രതീക്ഷ ഈ തെരഞ്ഞെടുപ്പില് പ്രതിഫലിക്കുമെന്നാണ് മാധ്യമങ്ങളോട് സംസാരിക്കവേ അദ്ദേഹം പറഞ്ഞത്.
അതേസമയം കേന്ദ്ര-സംസ്ഥാന സര്ക്കാരുകള്ക്കെതിരായി ജനങ്ങള് അതിശക്തമായ വികാരം പ്രകടിപ്പിക്കാന് പോകുന്ന ഒരു കാഴ്ചയാണ് നമ്മള് കണ്ടുകൊണ്ടിരിക്കുന്നതെന്നും എന്ന് അദ്ദേഹം കൂട്ടിച്ചേര്ത്തു.
അതേസമയം സംസ്ഥാനത്തെ അഞ്ച് ജില്ലകളില് പോളിങ് ആരംഭിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, ഇടുക്കി എന്നീ ജില്ലകളിലാണ് തദ്ദേശ തെരഞ്ഞെടുപ്പിന്റെ ആദ്യ ഘട്ട പോളിങ് നടക്കുന്നത്. ആദ്യ മണിക്കൂറില് തന്നെ മികച്ച പോളിങാണ് രേഖപ്പെടുത്തിയിരിക്കുന്നത്.
അഞ്ച് ജില്ലകളിലായി 24,584 സ്ഥാനാര്ത്ഥികളാണ് ഇന്ന് ജനവിധി തേടുന്നത്. 88,26,620 വോട്ടര്മാരാണ് ആദ്യ ഘട്ടത്തില് വോട്ട് രേഖപ്പെടുത്തുന്നത്. 318 ഗ്രാമപഞ്ചായത്തുകളിലും 50 ബ്ലോക്ക് പഞ്ചായത്തുകളിലും 2 കോര്പറേഷനുകളിലും 20 മുനിസിപ്പാലിറ്റികളിലും അഞ്ച് ജില്ലാ പഞ്ചായത്തുകളിലുമാണ് ഇന്ന് വോട്ടെടുപ്പ്.
Discussion about this post