ആലപ്പുഴ: കുതിച്ചുയര്ന്ന് മുല്ലപ്പൂ വില. ഒരു മുഴം പൂവിന് മൊത്തവിപണിയില് 160 രൂപയും ചില്ലറവിപണിയില് 210 രൂപയുമാണ് വില. ഓണവിപണിയിലെ വിലയെക്കാള് 25 ശതമാനം വരെ വര്ധനവാണ് നിലവിലുള്ളത്. മഴയും മഞ്ഞും വെല്ലുവിളിയായതോടെ ഉത്പാദനം കുറഞ്ഞതും വിവാഹ, ഉത്സവ സീസണുകളുമാണ് പൂവില ഉയരാന് കാരണം. കിലോയ്ക്ക് 7000 രൂപ മുതല് 8000 രൂപ വരെയാണ് മുല്ലപ്പൂവിന് വിലയുള്ളത്. ദിവസേന വില വര്ദ്ധിക്കുന്നതിനൊപ്പം പൂവ് കിട്ടാനില്ലെന്നതും പ്രതിസന്ധിയാണ്.
തണുപ്പുകാലത്ത് മുല്ലപ്പൂവിന്റെ ഉത്പാദനം കുറയും. പൂവും ചെറുതാകും. കരിമൊട്ടുകളാണ് നിലവില് വിപണികളില് കൂടുതലായും ലഭിക്കുന്നത്. ദിണ്ടികല്, മധുര, മൈസൂരു, നെലക്കോട്ട, ശങ്കരന്കോവില്, തെങ്കാശി, കമ്പം, തേനി, കോയമ്പത്തൂര്, മധുര, സത്യമംഗലം ഭാഗങ്ങളില് നിന്നാണ് കേരളത്തിലേക്ക് മുല്ലപ്പൂവ് എത്തുന്നത്. പിച്ചിക്കും വിപണിയില് മുഴത്തിന് നൂറിനു മുകളില് വിലയുണ്ട്.
Discussion about this post