ജയ്പൂര്: താന് രാജ്യത്തിന് വേണ്ടി ചെയ്ത് കാര്യങ്ങള് പരിഗണിച്ച് മാത്രം ജനങ്ങള് വോട്ട് ചെയ്താല് മതിയെന്ന് പ്രധാനമന്ത്രി നരേന്ദ്രമോഡി. രാജസ്ഥാനിലെ നാഗൗറില് നടന്ന തെരഞ്ഞെടുപ്പ് പ്രചരണ റാലിയിയില് സംസാരിക്കുകയായിരുന്നു മോഡി.
‘ഞാന് വോട്ട് ചോദിക്കുന്നത് എന്റെ ചെറുമകനോ ചെറുമകള്ക്കോ വേണ്ടിയല്ല. മറിച്ച് ജനങ്ങളുടെ ക്ഷേമത്തിനും ജനങ്ങളുടെ സ്വപ്നങ്ങള് യാഥാര്ത്ഥ്യമാക്കാനും വേണ്ടിയാണ്. കോണ്ഗ്രസിന്റെ നാല് തലമുറ ജനങ്ങളിലേക്ക് ഇറങ്ങിച്ചെന്ന് അവരുടെ പ്രശ്നങ്ങള് മനസിലാക്കാന് ശ്രമിച്ചിരുന്നില്ല. സാധാരണക്കാരന്റെ വിഷമങ്ങള് അവര്ക്ക് മനസിലാവില്ല. എന്നാല് എല്ലാവരുടേയും ക്ഷേമവും എല്ലാവരുടെയും വികസനവുമാണ് ബിജെപിയുടെ മുദ്രാവാക്യം’- മോഡി പറഞ്ഞു.
റാലിയില് കോണ്ഗ്രസ് അധ്യക്ഷന് രാഹുല് ഗാന്ധിയെ കടന്നാക്രമിച്ചുകൊണ്ടായിരുന്നു മോഡിയുടെ പ്രസംഗം. വായില് വെള്ളിക്കരണ്ടിയുമായി ജനിച്ച രാഹുല് ഗാന്ധിക്ക് സാധാരണക്കാരുടെ പ്രശ്നങ്ങള് മനസിലാവില്ലെന്നായിരുന്നു മോഡി കുറ്റപ്പെടുത്തിയത്.
എന്നാല് മോഡിക്കെതിരെ രൂക്ഷപരാമര്ശവുമായി കോണ്ഗ്രസും തിരിച്ചടിച്ചു. ജനങ്ങള്ക്ക് വേണ്ടിയെന്ന് പറഞ്ഞ് ചെയ്ത എന്ത് പ്രവര്ത്തിയാണ് നിങ്ങള്ക്ക് അവരുടെ മുന്പില് വെക്കാനുള്ളത് എന്നായിരുന്നു. കോണ്ഗ്രസ് നേതാവ് ഗുലാം നബി ആസാദ് ചോദിച്ചത്.
സ്വന്തം നേട്ടങ്ങള് പാര്ലമെന്റില് പോലും വെക്കാന് മോഡിയെ കൊണ്ടാവില്ല. പിന്നല്ലേ ജനങ്ങള്ക്ക് മുന്പില്- അദ്ദേഹം ചോദിച്ചു. സ്വന്തം ഭരണനേട്ടങ്ങള് എന്തെന്ന് പോലും ഉയര്ത്തിക്കാണിക്കാനാവത്ത ഒരു ഭരണാധികാരിയാണ് മോഡിയെന്ന് ഗുലാം നബി ആസാദ് കുറ്റപ്പെടുത്തി.
Discussion about this post