ന്യൂഡല്‍ഹി: പിന്നിലൂടെ ബൈക്കിലെത്തി മാല പൊട്ടിച്ചെടുത്ത് കടന്നു കളയാന്‍ ശ്രമിച്ച കള്ളനെ പിടികൂടി ഒരമ്മയും മകളും. സംഭവത്തിന്റെ സിസിടിവി ദൃശ്യങ്ങള്‍ സമൂഹമാധ്യമങ്ങളില്‍ ഇതിനോടകം വൈറലായി കഴിഞ്ഞു. സംഭവത്തില്‍ ബഹളം കേട്ട് ഓടിയെത്തിയ വഴിയാത്രക്കാരും ചേര്‍ന്നാണ് മോഷ്ടാക്കളെ കീഴ്‌പ്പെടുത്തിയത്.
ഡല്‍ഹിയിലെ നാംഗലോയിലാണ് സംഭവം നടന്നത്. മോഷണശ്രമത്തിന്റേയും അമ്മയും മകളും ചേര്‍ന്ന് ബൈക്കില്‍ ഇരുന്ന മോഷ്ടാവിനെ പിടികൂടുന്നതിന്റേയും ദൃശ്യങ്ങളാണ് സമൂഹമാധ്യമങ്ങളില്‍ നിറയുന്നത്. വീഡിയോ കഴിഞ്ഞ ദിവസമാണ് മാധ്യമങ്ങള്‍ പുറത്തു വിട്ടത്. നാംഗലോയിലെ വീട്ടിലേക്ക് സൈക്കിള്‍ റിക്ഷയിലെത്തിയതായിരുന്നു അമ്മയും മകളും. റിക്ഷക്കാരന് പണം നല്‍കി റോഡ് മുറിച്ച് കടക്കാന്‍ നില്‍ക്കുമ്പോഴാണ് ബൈക്ക് പൊടുന്നനെ അടുത്തെത്തുന്നത്.
പിന്നിലിരുന്നയാള്‍ വീട്ടമ്മയുടെ കഴുത്തിലെ മാല പൊട്ടിക്കുകയും ചെയ്തു. ശേഷം ബൈക്ക് എടുത്ത് മുങ്ങാന്‍ ശ്രമിക്കുകയുമായിരുന്നു. എന്നാല്‍ മോഷ്ടാക്കളില്‍ ഒരാളെ അമ്മയും മകളും ചേര്‍ന്ന് പിടിച്ചു വലിച്ച് താഴെയിട്ടു. പിന്നാലെയാണ് വഴിയാത്രക്കാരും നാട്ടുകാരും ഓടിയെത്തിയത്. ബൈക്ക് ഓടിച്ചിരുന്നയാള്‍ ഇതിനിടെ ബൈക്ക് ഉപേക്ഷിച്ച് ഓടിപ്പോകുന്നുണ്ട്. എന്നാല്‍ ഇയാളെ നാട്ടുകാര്‍ പിന്നാലെയോടി പിടികൂടി. സംഭവം അറിഞ്ഞയുടനെ തന്നെ പോലീസ് പിന്നാലെയെത്തി രണ്ടുപേരെയും കസ്റ്റഡിയിലെടുത്തു. ഇവരുടെ പക്കല്‍ നിന്ന് മൂന്ന് ബൈക്കുകള്‍, രണ്ട് സ്വര്‍ണ്ണമാല, രണ്ട് മൊബൈല്‍ ഫോണുകള്‍ എന്നിവ പിടിച്ചെടുത്തതായി പോലീസ് പറയുന്നു.
#WATCH: Bike borne chain snatchers caught red-handed by a woman and her daughter in Nangloi, Delhi on August 30. The chain snatchers were later arrested by police. pic.twitter.com/vdLpztOKYw
— ANI (@ANI) September 3, 2019
Discussion about this post