കങ്കണ റണാവത്ത് നായികയായ പുതിയ ചിത്രം തേജസ് തിയേറ്ററില്‍ പരാജയമായതിന് പിന്നാലെ നടിക്ക് പരിഹാസവുമായി നടന്‍ പ്രകാശ് രാജ്. തേജസ് കാണാന്‍ തിയേറ്ററുകളിലേക്ക് പ്രേക്ഷകരെ ക്ഷണിച്ചതിനെയാണ് പ്രകാശ് രാജ് പരിഹസിച്ചത്. ഇന്‍സ്റ്റഗ്രാമിലെ നടിയുടെ വിഡിയോ പങ്കുവെച്ചുകൊണ്ടായിരുന്നു പ്രകാശ് രാജിന്റെ പരിഹാസം.
‘ഇന്ത്യക്ക് ഈയടുത്ത് 2014ല്‍ സ്വാതന്ത്ര്യം ലഭിച്ചതല്ലേയുളളൂ. അല്‍പം കാത്തിരിക്കൂ. അത് എടുക്കും’ എന്നായിരുന്നു പ്രകാശ് രാജ് എക്‌സില്‍ കുറിച്ചത്. justasking എന്ന ഹാഷ്ടാഗോട് കൂടിയായിരുന്നു ട്വീറ്റ്. നേരത്തെ കങ്കണബിജെപി സര്‍ക്കാരിനെ വാഴ്ത്തി സംസാരിക്കുന്നതിനിടെ 2014 ലാണ് ഇന്ത്യക്ക് യഥാര്‍ഥത്തില്‍ സ്വാതന്ത്ര്യം ലഭിച്ചതെന്ന് പറഞ്ഞിരുന്നു. ഈ പരാമര്‍ശമാണ് നടിക്കെതിരെ പ്രകാശ് രാജ് തിരിച്ച് പ്രയോഗിച്ചത്.
ഒക്ടോബര്‍ 27 പുറത്തിറങ്ങിയ ചിത്രം തിയറ്ററുകളില്‍ വലിയ പരാജയമായിരുന്നു. ചിത്രത്തിന് മൂന്ന് ദിവസം കൊണ്ട് വെറും മൂന്നുകോടിയോളമാണ് തിയേറ്ററില്‍ നിന്നും സമാഹരിക്കാനായത്. 100 കോടിയോളം ചിലവിട്ടാണ് ചിത്രം നിര്‍മ്മിച്ചത്. മൂന്നാമത്തെ ദിവസത്തോടെ ചിത്രം പ്രേക്ഷകരില്ലാത്ത സാഹചര്യത്തില്‍ തിയേറ്ററില്‍ നിന്നും പുറത്താകുന്ന സാഹചര്യമാണ് വന്നത്. ഇതോടെ കുടുംബത്തിനൊപ്പം ചിത്രം കാണണമെന്ന് അഭ്യര്‍ഥിച്ച് കങ്കണ രംഗത്തെത്തുകയായിരുന്നു.
കോവിഡിനു ശേഷം തിയറ്ററുകളുടെ പ്രതിസന്ധി ഇരട്ടിയായെന്നും സൗജന്യമായി ടിക്കറ്റുകള്‍ കൊടുക്കുന്നത് മുതല്‍ നിരവധി ഓഫറുകള്‍ നല്‍കിയിട്ടുവരെ തിയറ്ററിലേക്ക് ജനങ്ങള്‍ വരാതിരിക്കുകയാണെന്നും കങ്കണ വീഡിയോയില്‍ പറഞ്ഞിരുന്നു.
കുടുംബത്തോടൊപ്പം തിയറ്ററിലേക്ക് വന്ന് സിനിമ ആസ്വദിക്കണമെന്ന് ഞാന്‍ പ്രേക്ഷകരോട് അഭ്യര്‍ഥിക്കുകയാണ്. അല്ലെങ്കില്‍ തിയറ്ററുകള്‍ക്ക് നിലനില്‍പ്പുണ്ടാവില്ലെന്നും കങ്കണ പറഞ്ഞിരുന്നു.
സര്‍വേഷ് മേവാര രചനയും സംവിധാനവും നിര്‍വഹിച്ച തേജസ് എന്ന ചിത്രം ഒക്ടോബര്‍ 27 നാണ് തിയറ്ററുകളില്‍ എത്തിയത്. തേജസ് ഗില്‍ എന്ന ഫൈറ്റര്‍ പൈലറ്റിന്റെ വേഷത്തില്‍ ആണ് കങ്കണ എത്തിയത്.
നേരത്തെ നടിയുടെതായി പുറത്തിറങ്ങിയ ചന്ദ്രമുഖി 2 ഭാഗവും വന്‍ പരാജയമായിരുന്നു. ‘എമര്‍ജന്‍സി’യാണ് വരാനിരിക്കുന്ന കങ്കണ ചിത്രം. ചിത്രത്തില്‍ മുന്‍ പ്രധാനമന്ത്രി ഇന്ദിര ഗാന്ധിയായാണ് കങ്കണ അഭിനയിക്കുന്നത്.
Discussion about this post