കൊച്ചി: നടന് ടൊവിനോ തോമസ് തന്റെ പ്രതിഫലം കുറച്ചുവെന്ന രീതിയില് കഴിഞ്ഞ ദിവസം വാര്ത്തകള് പുറത്തുവന്നിരുന്നു. എന്നാല് ഈ വാര്ത്തകളെല്ലാം തള്ളി രംഗത്തെത്തിയിരിക്കുകയാണ് ടോവിനോ തോമസ് ഇപ്പോള്. താന് പ്രതിഫലം കുറച്ചിട്ടില്ലെന്ന് താരം വ്യക്തമാക്കി.
പ്രതിഫലത്തിന്റെ കാര്യത്തില് സാവകാശം നല്കുകയാണുണ്ടായതെന്നും ടൊവിനോ തോമസ് പ്രതികരിച്ചു. ഡ്രീംക്യാറ്റ്ച്ചറിന്റെ ബാനറില് മനു അശോകന് സംവിധാനം ചെയ്യുന്ന ‘കാണെക്കാണെ’ എന്ന ചിത്രത്തില് ടോവിനോ തോമസിന്റെ പ്രതിഫലം ഒരു കോടി രൂപയാണ്.
പ്രൊജക്ട് റിപ്പോര്ട്ടിലാണ് ഇക്കാര്യം കാണിച്ചിരിക്കന്നത്. എന്നാല് ചിത്രത്തില് പ്രതിഫലം വാങ്ങാതെയാണ് ടോവിനോ അഭിനയിക്കുന്നതെന്ന നിര്മാതാവ് ഷംസുദ്ദീന്റെ അറിയിപ്പാണ് ആശയക്കുഴപ്പം ഉണ്ടാക്കിയത്. സിനിമയുടെ റിലീസിന് ശേഷം സാമ്പത്തിക ലാഭം നോക്കിയായിരിക്കും പ്രതിഫലം കൈപ്പറ്റുന്നതെന്നും അല്ലാതെ പ്രതിഫലം കുറയ്ക്കുയല്ല ഉണ്ടായതെന്നുമാണ് ഇപ്പോള് വ്യക്തത വരുത്തിയിരിക്കുന്നത്.
ലാഭം കിട്ടുമ്പോള് കൊടുക്കേണ്ടി വരുന്ന നിര്മാണ ചിലവ് കണക്കാക്കിയാണ് പ്രൊജക്ട് റിപ്പോര്ട്ട് സമര്പ്പിച്ചിരിക്കുന്നതെന്നും ഇതൊരു പിശകായി സംഭവിച്ചതാണെന്നും നിര്മാതാവ് ഷംസുദ്ദീന് കേരള ഫിലിം പ്രൊഡ്യൂസേഴ്സ് അസോസിയേഷന് നല്കിയ കത്തില് വിശദീകരിച്ചു.
Discussion about this post