ഏറ്റവും കൂടുതൽ കൊവിഡ് ടെസ്റ്റ് നടത്തി; ഗോവ രാജ്യത്ത് ഒന്നാമതെന്ന് ആരോഗ്യമന്ത്രി

പനജി: ഗോവയിലാണ് രാജ്യത്തെ തന്നെ ഏറ്റവുമധികം കൊവിഡ് ടെസ്റ്റുകൾ നടന്നതെന്ന് ഗോവൻ സർക്കാർ. രാജ്യത്ത് ഏറ്റവും കൂടുതൽ കൊവിഡ് 19 ടെസ്റ്റുകൾ നടത്തിയത് ഗോവയെന്ന് ആരോഗ്യമന്ത്രി വിശ്വജിത് റാണെയാണ് അറിയിച്ചത്. ചൊവ്വാഴ്ച വരെയുള്ള കണക്കനുസരിച്ച് 1,53,792 ടെസ്റ്റുകൾ ഗോവയിൽ നടത്തിയെന്നാണ് വിവരം.

‘കൊവിഡിനെതിരെ പരമാവധി ആളുകളെ പരിശോധിക്കാനുള്ള സംസ്ഥാന സർക്കാരിന്റെ നിരന്തരമായ ശ്രമത്തിൽ 94,773 ടെസ്റ്റുകൾ നടത്തി ഒന്നാമതായതിൽ അതിയായ സന്തോഷമുണ്ട്’റാണെ ചൊവ്വാഴ്ച രാത്രി ട്വീറ്റ് ചെയ്തു.

ഗോവയിൽ ഇതുവരെ 9,029 കൊവിഡ് കേസുകൾ റിപ്പോർട്ട് ചെയ്തിട്ടുണ്ട്. ഇതുവരെ 80 പേർ കൊവിഡ് ബാധിച്ച് മരണമടഞ്ഞു. സംസ്ഥാനത്ത് 2,878 സജീവ കേസുകളുണ്ട്.