ഏറ്റുമാനൂര്: കൂട്ടുകാരിയുടെ ഹാള് ടിക്കറ്റിന്റെ കോപ്പിയെടുത്ത് സ്വന്തം ഫോട്ടോ പതിപ്പിച്ച് എന്ട്രന്സ് പരീക്ഷ എഴുതാന് എത്തിയ പെണ്കുട്ടി പിടിയില്. എയിംസിലേയ്ക്കുള്ള എംബിബിഎസ് പ്രവേശന പരീക്ഷയ്ക്കിടെയാണ് സംഭവം. ഏറ്റുമാനൂര് തവളക്കുഴിയിലുള്ള പരീക്ഷാകേന്ദ്രത്തിലാണ് പെണ്കുട്ടി വ്യാജ ഹാള് ടിക്കറ്റുമായി എത്തിയത്.
സംഭവത്തില് കോട്ടയം എരുമേലി സ്വദേശിയായ പെണ്കുട്ടിക്കെതിരേ പോലീസ് കേസെടുത്തു. പെണ്കുട്ടിയുടെ എന്ട്രന്സ് പരീക്ഷ എഴുതുന്നതിനുള്ള അപേക്ഷ നേരത്തെ തള്ളിയിരുന്നു. എന്നാല് നാല് വര്ഷമായി എംബിബിഎസിനു ശ്രമിക്കുന്ന പെണ്കുട്ടി വീട്ടുകാരെ ഈ വിവരം അറിയിച്ചില്ല.
ഹോസ്റ്റലില് ഒരേ മുറിയില് താമസിക്കുന്ന സുഹൃത്തിന്റെ ഹാള് ടിക്കറ്റ് കോപ്പി ചെയ്തെടുത്ത് ഫോട്ടോയും മറ്റു വിവരങ്ങളും ചേര്ക്കുകയായിരുന്നു. എന്നാല് റോള് നമ്പര് മാറ്റിയിരുന്നില്ല. ഇതാണ് എല്ലാ പദ്ധതികളും പൊളിയാന് ഇടയായത്. രണ്ടുപേരും ഒരേ റോള് നമ്പരില് പരീക്ഷയെഴുതാനെത്തിയതിനെ തുടര്ന്ന് പരീക്ഷാ നടത്തിപ്പുകാര് പോലീസില് വിവരമറിയിക്കുകയായിരുന്നു. കേസെടുത്ത ശേഷം പെണ്കുട്ടിയെ വീട്ടുകാര്ക്കൊപ്പം ജാമ്യത്തില് വിട്ടയച്ചു.
Discussion about this post