കണ്ണൂര്: കണ്ണൂരില് സ്കൂള് ബസ് നിയന്ത്രണം വിട്ട് മറിഞ്ഞുണ്ടായ അപകടത്തില് ഗുരുതരമായി പരിക്കേറ്റ വിദ്യാര്ത്ഥിനി മരിച്ചു. ചൊറുക്കള സ്വദേശിനിയുമായ നേദ്യ എസ് രാജേഷ് ആണ് മരിച്ചത്.
കണ്ണൂര് തളിപ്പറമ്പിന് സമീപമുള്ള കുറുമാത്തൂര് പഞ്ചായത്തിലെ ചിന്മയ സ്കൂളിലെ അഞ്ചാം ക്ലാസ് വിദ്യാര്ത്ഥിനിയാണ് നേദ്യ. കുട്ടിയുടെ മൃതദേഹം പരിയാരം മെഡിക്കല് കോളേജ് മോര്ച്ചറിയിലേക്ക് മാറ്റി. അപകടത്തില് ബസിലുണ്ടായിരുന്ന 18 കുട്ടികള്ക്ക് പരിക്കേറ്റു.
ഇട റോഡിലെ ഇറക്കത്തില് നിന്ന് നിയന്ത്രണം വിട്ട ബസ് മതിലിലേക്ക് ഇടിച്ചുകയറി പലതവണ മലക്കം മറിഞ്ഞശേഷം ശ്രീകണ്ഠാപുരം-തളിപ്പറമ്പ് പ്രധാന റോഡിലേക്ക് തെറിച്ചുവീഴുകയായിരുന്നു. ബസില് നിന്ന് പെണ്കുട്ടി തെറിച്ചുപോവുകയായിരുന്നു.
തുടര്ന്ന് ബസിനടയില്പ്പെട്ടു. ബസ് ഉയര്ത്തിയശേഷം കുട്ടിയെ ആശുപത്രിയിലെത്തിച്ചെങ്കിലും രക്ഷിക്കാനായില്ല. അപകടത്തില് പരിക്കേറ്റ 18 കുട്ടികളെ തളിപ്പറമ്പ് താലൂക്ക് ആശുപത്രിയിലും തളിപ്പറമ്പ് സഹകരണ ആശുപത്രിയിലും പ്രവേശിപ്പിച്ചു. ബസ് ഡ്രൈവര്ക്കും പരിക്കേറ്റിട്ടുണ്ട്.
Discussion about this post