തിരുവനന്തപുരം: പത്ര സമ്മേളനത്തിനിടെ കെപിസിസി പ്രസിഡന്റ് കെ സുധാകരനുമായി തർക്കത്തിലേർപ്പെടുന്ന വീഡിയോസോഷ്യൽമീഡിയയിൽ വൈറലാകുന്നു. പുതുപ്പള്ളി വിജയത്തിന് ശേഷം കോട്ടയം ഡിസിസി ഓഫീസിൽ നടത്തിയ പത്രസമ്മേളനത്തിനിടെയാണ് ഇരുവരും തർക്കമുണ്ടായത്.
സംഭവം വലിയ ചർച്ചയായതോടെ വിശദീകരണവുമായി പ്രതിപക്ഷനേതാവ് വിഡി സതീശൻ രംഗത്തെത്തി. പുതുപ്പള്ളി വിജയത്തിന്റെ ക്രെഡിറ്റ് മുഴുവൻ കെപിസിസി പ്രസിഡന്റ് തനിക്ക് വകവെച്ചു തന്നത് താൻ എതിർത്തുവെന്നും അതിന്റെ പേരിലാണ് തർക്കം നടന്നതെന്നും സതീശൻ പറഞ്ഞു. തിരുവനന്തപുരത്ത് നടത്തിയ വാർത്താ സമ്മേളനത്തിലാണ് സതീശന്റെ വിശദീകകരിച്ചത്.
‘ഞാനും കെപിസിസി പ്രസിഡന്റും തമ്മിൽ തർക്കമുണ്ടായി എന്നത് സത്യമാണ് അവിടെ വെച്ചല്ല, ഡിസിസി ഓഫിസിൽ വെച്ചാന് തർക്കമുണ്ടായത് 37000ത്തിലധികം വോട്ടിന് ജയിച്ചപ്പോൾ ഈ വിജയത്തിന്റെ ക്രെഡിറ്റ് മുഴുവൻ പ്രതിപക്ഷ നേതാവിനാണെന്ന് താൻ വാർത്താസമ്മേളനത്തിൽ പറയാൻ പോവുകയാണ് എന്ന് അദ്ദേഹം (സുധാകരൻ) പറഞ്ഞു ഞാൻ പറഞ്ഞു, ഒരുകാരണവശാലും പറയാൻ പാടില്ല ഇതിന്റെ മുഴുവൻ ക്രെഡിറ്റും ടീം യുഡിഎഫിനാണെന്ന് അങ്ങ് പറയണം എന്ന് ഞാൻ പറഞ്ഞു’- സംഭവം വിഡി സതീശൻ വിശദീകരിച്ചതിങ്ങനെ.
‘എന്നാൽ, മുഴുവൻ ക്രെഡിറ്റും ടീം യുഡിഎഫിനാണെന്ന് താൻ പറയില്ലെന്നും പ്രതിപക്ഷനേതാവിന്റെ ക്രെഡിറ്റാണെന്ന് പറയും എന്നും സുധാകരൻ പറഞ്ഞു വാർത്താസമ്മേളനത്തിൽ അങ്ങനെ പറയാൻ വന്ന അദ്ദേഹത്തെ തടയുന്നതാണ് വീഡിയോയിലുള്ളതെന്ന് അദ്ദേഹം പറഞ്ഞു.
‘ഞാനാണ് കെപിസിസി പ്രസിഡന്റ്, ഞാൻ ആദ്യം പറയും’ എന്ന് അദ്ദേഹം വാശിപിടിച്ചു അപ്പോൾ ഞാൻ മൈക്ക് നീക്കിവെച്ചു എല്ലാത്തിന്റെയും ക്രെഡിറ്റ് പ്രതിപക്ഷ നേതാവിനാണെന്ന് അദ്ദേഹം പറയുകയും ചെയ്തു. ഞാൻ കൈയിൽ പിടിച്ചും കാലിലും അമർത്തി പറയല്ലേ, പറയല്ലേ എന്ന് പറഞ്ഞതാണ് എന്നിട്ടും അദ്ദേഹം പറഞ്ഞു.
ഞാൻ മാത്രമല്ല കഷ്ടപ്പെട്ടത് എനിക്ക് മാത്രം ക്രെഡിറ്റ് തരുന്നതിൽ അനൗചിത്യവും അരോചകത്വവുമുണ്ട് പുള്ളി അതൊന്നും വിട്ടുകൊടുക്കൂല ഒരുകാര്യം പറയണമെന്ന് കരുതിയാൽ പറഞ്ഞിട്ടേ പോകൂ വാശിക്കാരനാണ് ഇതാണ് സത്യമെന്നും വിഡി സതീഷൻ വിശദീകരിച്ചു.
തുടർന്നുള്ള മാധ്യമപ്രവർത്തകരുടെ ചോദ്യങ്ങൾക്ക് ഞാൻ മറുപടി പറയാതിരുന്നത് എന്റെ ശബ്ദം മോശമായതിനാലാണെന്നും കെപിസിസി പ്രസിഡന്റ് എല്ലാകാര്യങ്ങളും വിശദീകരിച്ചത് ഞാൻ ആവർത്തിക്കണ്ടല്ലോ എന്നും കരുതിയെന്നും അദ്ദേഹം പറയുന്നു.
അതേസമയം, പുറത്തുവന്ന വീഡിയോയിൽ മാധ്യമപ്രവർത്തകരോട് താൻ സംസാരിച്ചുതുടങ്ങാമെന്ന് കെ സുധാകരൻ പറയുന്നത് കാണാം. വിഡി സതീശൻ ഇതിൽ അതൃപ്തി പ്രകടിപ്പിക്കുന്നതും ദൃശ്യങ്ങളിൽ വ്യക്തമാണ്. തുടർന്ന് കെ സുധാകരൻ വീശി തുടർന്നതോടെ സതീശൻ തന്റെ മുന്നിലിരുന്ന മൈക്കുകൾ സുധാകരന്റെ മുന്നിലേക്ക് നീക്കിവെക്കുുകയാണ്. മുഖത്തെ അതൃപ്തി ദൃശ്യങ്ങളിലുണ്ട്. ഒപ്പം തനിക്ക് നേരെ നീട്ടിയ പൊന്നാട ദേഷ്യത്തോടെ നിഷേധിക്കുന്നതും ദൃശ്യങ്ങളിലുണ്ട്. ഇത് വലിയ രീതിയിൽ ട്രോളായിരുന്നു. പിന്നാലെയാണ് വിഡി സതീശന്റെ പ്രതികരണമെത്തിയത്.
Discussion about this post