തിരുവനന്തപുരം: ഉടമയറിയാതെ പറമ്പില് നിന്നും മുറിച്ചുകടത്തിയത് കായ് ഫലമുള്ള 60 ഓളം തെങ്ങുകള്. മംഗലാപുരത്താണ് സംഭവം. തോന്നയ്ക്കലില് ഷമീന മന്സിലില് ഷമീനയുടെ ചുറ്റുമതിലുള്ള രണ്ടേക്കര് വരുന്ന പുരയിടത്തിലെ തെങ്ങുകളാണ് മുറിച്ചു കടത്തിയത്.
സംഭവവുമായി ബന്ധപ്പെട്ട് അയല്വാസിയായ സുധീറിനെ മംഗലപുരം പൊലീസ് അറസ്റ്റ് ചെയ്തു. സുധീറിന്റെ കൂട്ടുപ്രതിയായ തടിക്കച്ചവടക്കാരനായ ഫസല് ഒളിവിലാണ്. ഫസല് വഴിയാണ് സുധീര് തെങ്ങ് മുറിക്കുന്നതിനുള്ള ഒത്തശ ചെയ്തതെന്ന് പൊലീസ് പറയുന്നു.
രണ്ടുദിവസം കൊണ്ടാണ് തുടിയാവൂര് മാടന്കാവ് ക്ഷേത്രത്തിന് മുന്വശത്തായുള്ള പുരയിടത്തില് നിന്ന് തെങ്ങുകള് മുറിച്ച് കടത്തിയത്. രണ്ടാം ദിവസവും തെങ്ങുകള് മുറിക്കുന്നത് ശ്രദ്ധയില്പ്പെട്ട അയല്വാസികള് സ്ഥലം ഉടയെ വിളിച്ചറിയിക്കുകയായിരുന്നു.
അപ്പോഴാണ് ഉടമ വിവരം അറിയുന്നത്. തുടര്ന്ന് ഷമീനയുടെ സഹോദരന് സ്ഥലത്തെത്തിയപ്പോള് പുരയിടത്തിന് പിന്നിലുള്ള മതില് വഴി മുറിച്ച തെങ്ങിന് തടികള് ലോറിയില് കയറ്റുന്നതായി കണ്ടത്. തുടര്ന്ന് മംഗലപുരം പൊലീസില് വിവരം അറിയിച്ചു.
അതിനിടെ പൊലീസ് വരുന്നതറിഞ്ഞ സംഘം ലോറി ഉപേക്ഷിച്ച് കടന്നു കളയുകയായിരുന്നു. സ്ഥലത്തുണ്ടായിരുന്ന TN 75 J 3188 എന്ന രജിസ്റ്റര് നമ്പറിലുള്ള ലോറി തെങ്ങിന് തടി പകുതി കയറ്റിയ നിലയില് പറമ്പിന് സമീപത്ത് നിന്ന് പൊലീസ് കസ്റ്റഡിയില് എടുത്തു.
ഇതിന് പിന്നാലെയാണ് പ്രതികള് പിടിയിലായത്. തമിഴ്നാട്ടില് ഇഷ്ടിക കളത്തില് കത്തിക്കാനാണ് തെങ്ങുകള് മുറിച്ചു കടത്തിയതെന്ന് പൊലീസ് പറയുന്നു.
Discussion about this post