തിരുവനന്തപുരം: കെഎസ്ആര്ടിസി ബസിലെ പരസ്യങ്ങള് നിയമലംഘനമല്ലെന്നും പരസ്യങ്ങള് പ്രദര്ശിപ്പിക്കുന്നതില് തെറ്റില്ലെന്നും ഗതാഗതമന്ത്രി ആന്റണി രാജു. നിലവിലെ ഗതാഗത ചട്ടം അനുസരിച്ച് സര്ക്കാര് അനുമതിയോടെ വാഹനങ്ങളില് പരസ്യം പതിക്കാന് സര്ക്കാര് അനുമതി നല്കിയിട്ടുണ്ടെന്നും മന്ത്രി പറഞ്ഞു. റിവ്യൂ ഹര്ജി നല്കി ഇക്കാര്യം ഹൈക്കോടതിയുടെ ശ്രദ്ധയില് പെടുത്തുമെന്നും ആന്റണി രാജു അറിയിച്ചു.
കഴിഞ്ഞ ദിവസമാണ് കെഎസ്ആടിസി ബസുകളില് പരസ്യങ്ങള് പാടില്ലെന്ന് ഹൈക്കോടതി ഉത്തരവിട്ടത്. സുരക്ഷാ മാനദണ്ഡം പാലിക്കുന്നതില് സ്വകാര്യ-പൊതു വാഹനങ്ങള് എന്ന വ്യത്യാസമില്ലെന്നും നിലവില് പതിച്ചിട്ടുള്ള പരസ്യങ്ങള് നീക്കം ചെയ്യണമെന്നും ഹൈക്കോടതി നിര്ദദേശിച്ചിരുന്നു.
പരസ്യങ്ങള് എതിരെ വരുന്ന വാഹനങ്ങളിലെ ഡ്രൈവര്മാരുടെ ശ്രദ്ധ തിരിക്കുന്നതായും ഇത് സുരക്ഷാ മാനദണ്ഡങ്ങള്ക്ക് വിരുദ്ധമാണെന്നും കോടതി വ്യക്തമാക്കി. വടക്കാഞ്ചേരി ബസ് അപകടവുമായി ബന്ധപ്പെട്ട് സ്വമേധയാ എടുത്ത കേസിലാണ് ഹൈക്കോടതിയുടെ ഉത്തരവ്.
കെഎസ്ആര്ടിസി, കെയുആര്ടിസി ബസുകളിലെ പരസ്യങ്ങള് സുരക്ഷാ മാനദണ്ഡങ്ങള്ക്ക് വിരുദ്ധമാണെന്ന് കോടതി നിരീക്ഷിച്ചു. ഇത്തരം പരസ്യങ്ങള് പാടില്ലെന്ന് ജസ്റ്റിസുമാരായ അനില് കെ നരേന്ദ്രന്, പി ജി അജിത്കുമാര് എന്നിവരടങ്ങിയ ഹൈക്കോടതി ഡിവിഷന് ബെഞ്ച് ഉത്തരവിട്ടു.
Discussion about this post