തിരുവനന്തപുരം: സമൂഹത്തിൽ സ്ത്രീ വിവേചനവും സ്ത്രീധനം ഉൾപ്പടെയുള്ള അനാചാരങ്ങളും ജീവനെടുക്കുന്നതിനിടെ ലിംഗ നീതിയെ കുറിച്ച് അവബോധമുണ്ടാകുന്ന തരത്തിൽ പാഠ്യപദ്ധതിയിലും പരിഷ്‌കാരങ്ങൾ വന്നേക്കും. ലിംഗ തുല്യതയുടേയും ലിംഗനീതിയുടേയും ലിംഗാവബോധത്തിന്റേയും കാഴ്ചപ്പാടിൽ പാഠപുസ്തകങ്ങൾ ഓഡിറ്റ് ചെയ്യപ്പെടണമെന്ന് പൊതുവിദ്യാഭ്യാസ -തൊഴിൽ മന്ത്രി വി ശിവൻകുട്ടി. ജനാധിപത്യ മതനിരപേക്ഷ സമൂഹത്തിന്റെ അടിത്തറതന്നെ തുല്യതയിലും നീതിയിലും അധിഷ്ഠിതമാണ്. അതുകൊണ്ടുതന്നെ ‘സ്ത്രീപുരുഷ സമത്വത്തിന്റേതായ പുതിയ ചിന്തകൾ നമ്മുടെ സമൂഹത്തിന് ആവശ്യമായ കാലമാണിത്. അതിനുതകുന്ന പാഠങ്ങൾ പാഠ്യപദ്ധതിയിൽ ഉൾപ്പെടുത്തുന്നത് ഉൾപ്പെടെയുള്ള കാര്യങ്ങൾ സർക്കാർ പരിശോധിക്കും. ആധുനിക സമൂഹമെന്ന നിലയ്ക്ക് വിജ്ഞാന സമ്പദ്ഘടനയിലേക്കു കേരളത്തെ പരിവർത്തിപ്പിക്കാനാണ് നാം ശ്രമിക്കുന്നത്. അതിനു ഉയർന്ന അറിവും ശേഷിയും ഉള്ള തലമുറയെ വാർത്തെടുക്കേണ്ടതുണ്ട്. അവിടെ ലിംഗപരമായ ഉച്ചനീചത്വങ്ങൾക്ക് സ്ഥാനമുണ്ടാവില്ല എന്നുറപ്പു വരുത്താനുള്ള ഉത്തരവാദിത്തം നാം ഓരോരുത്തർക്കും ഉണ്ടെന്നും മന്ത്രി പുറത്തിറക്കിയ പത്രക്കുറിപ്പിലൂടെ അഭിപ്രായപ്പെട്ടു.
‘മുഖ്യമന്ത്രിയുടെ വാക്കുകളുടെ ഉള്ളടക്കത്തെ വിദ്യാഭ്യാസ വകുപ്പ് സമഗ്രമായി ഉൾക്കൊള്ളുന്നുവെന്നും മന്ത്രി വ്യക്തമാക്കി. സ്‌കൂൾ വിദ്യാഭ്യാസത്തിന് ഇക്കാര്യത്തിൽ പ്രധാനമായ ഒരു പങ്കുണ്ട്. ആയതിനാൽ ഈ ദിശയിലുള്ള പഠനങ്ങൾ പാഠ്യപദ്ധതിയിൽ ഉൾപ്പെടുത്തുന്ന കാര്യം സജീവമായി പരിഗണിക്കും. ജ്ഞാന സമൂഹത്തിലേക്ക് കേരളത്തെ പരിവർത്തിപ്പിക്കാനുള്ള ശ്രമം വളർത്തിയെടുക്കും. എല്ലാവർക്കും കഴിവുകളുണ്ട്. ആ കഴിവുകളാണ് ജീവിതത്തിൽ ഉപയോഗിക്കപ്പെടേണ്ടത്.സ്‌കൂൾ ക്യാമ്പസുകൾ ലിംഗ തുല്യത, ലിംഗനീതി, ലിംഗാവബോധം തുടങ്ങിയവ ഉൾക്കൊള്ളുന്ന ഇടങ്ങളായി മാറണം. അത്തരത്തിൽ സ്‌കൂൾ ക്യാമ്പസുകളെ വളർത്തിയെടുക്കണം.ഇതിനായി ഉള്ളടക്കത്തിലും പഠനപ്രക്രിയയിലും മാറ്റങ്ങൾ ഉണ്ടാകണം. ലിംഗതുല്യതക്ക് തടസമായി നിൽക്കുന്ന വാചകങ്ങളും വാക്കുകളും ഉണ്ടോയെന്ന് പരിശോധിച്ച് മാറ്റങ്ങൾ ആവശ്യമുണ്ടെങ്കിൽ അത് വരുത്തണം. ശക്തിയെ ശക്തിപ്പെടുത്താനും പരിമിതികളെ മറികടക്കാനും ബോധപൂർവ്വമായ ശ്രമം നടത്തണം.
പാഠ്യപദ്ധതി പരിഷ്‌കരിക്കുമ്പോൾ ഈ കാര്യങ്ങളിൽ ഗൗരവമായ പരിഗണന ഉണ്ടാകും. ലിംഗനീതിയും ലിംഗ തുല്യതയും ഉറപ്പുവരുത്താനുള്ള ശ്രമങ്ങൾ ഉണ്ടാകും. ഭരണഘടനാ മൂല്യങ്ങൾ ഉളവാകുന്നതിനും പൗരബോധം വികസിപ്പിക്കുന്നതിനുള്ള ശ്രമങ്ങളും ഇതിന്റെ ഭാഗമായി ഉണ്ടാകുമെന്നും മന്ത്രി വി ശിവൻകുട്ടി വ്യക്തമാക്കി.
