കോന്നി(പത്തനംതിട്ട): ഭാര്യയെ വെട്ടിക്കൊലപ്പെടുത്തി ഭര്ത്താവ് ആറ്റില് ചാടി ജീവനൊടുക്കി. കോന്നി അത്തച്ചാക്കലിലാണ് സംഭവം. അത്തച്ചാക്കല് മുട്ടത്ത് വടക്കേതില് കെആര് ഗണനാഥന് (67) ആണ് ഭാര്യ രമണി(65)യെ കൊലപ്പെടുത്തിയ ശേഷം ജീവനൊടുക്കിയത്. ശനിയാഴ്ച രാവിലെ എട്ട് മണിയോടെയായിരുന്നു സംഭവം. രാവിലെ വീട്ടില്നിന്ന് റോഡിലേക്ക് പോകുമ്പോള് ഗണനാഥന് കാല് തെറ്റി വീണിരുന്നു.
സമീപവാസികളാണ് ഇയാളെ എഴുന്നേല്പ്പിച്ച് റോഡിലേയ്ക്ക് എത്തിച്ചത്. ഇതിനിടെ ഭാര്യ മരണപ്പെട്ടെന്ന് മാത്രം പറഞ്ഞ് അദ്ദേഹം നടന്നുപോവുകയും ചെയ്തു. സമീപവാസികളെത്തി വീട് പരിശോധിച്ചപ്പോഴാണ് വെട്ടേറ്റ് കിടക്കുന്ന രമണിയെ കണ്ടത്. നാട്ടുകാര് ഉടന്തന്നെ പഞ്ചായത്ത് അംഗത്തെയും പോലീസിനെയും വിവരമറിയിക്കുകയായിരുന്നു.
ഇതിനിടെ ഗണനാഥന് അച്ചന്കോവിലാറിന് സമീപത്തേക്ക് പോകുന്നത് കണ്ടെന്ന് ചിലര് പോലീസിനെ അറിയിച്ചു. തുടര്ന്ന് പോലീസും നാട്ടുകാരും നടത്തിയ അന്വേഷണത്തില് 11 മണിയോടെ പുഴയില്നിന്ന് ഗണനാഥന്റെ മൃതദേഹം കണ്ടെടുക്കുകയായിരുന്നു. കൊലപാതകത്തിനും ആത്മഹത്യയ്ക്കും പിന്നില് കാരണമെന്താണെന്ന് വ്യക്തമായിട്ടില്ല.
Discussion about this post