കൊവിഡ് ഭീതിയില്‍ കഴിയുമ്പോഴും ജനങ്ങള്‍ക്ക് മതിമറന്ന് ചിരിക്കാനുള്ള വകയുണ്ടാക്കിത്തരുന്നവാണ് ട്രോളന്മാര്‍. ലോക് ഡൗണ്‍ കാലത്തും സമൂഹമാധ്യമങ്ങളില്‍ ട്രോളുകള്‍ക്ക് മാത്രം ഒരു പഞ്ഞവുമില്ല. ചില നിര്‍ദ്ദോഷമായ തമാശകള്‍ ആരെയും വേദനിപ്പിക്കാതെ പൊട്ടിച്ചിരിപ്പിക്കും.
അത്തരത്തില്‍ തികച്ചും വ്യത്യസ്തമായ ഒരു പാട്ടിന്റെ രൂപത്തിലുള്ള ട്രോള്‍ വീഡിയോയാണ് ഇപ്പോള്‍ ജനങ്ങളെയൊന്നടങ്കം പൊട്ടിച്ചിരിപ്പിക്കുന്നത്. മോഡിയും ഒബാമയുമടക്കമുള്ള ലോകനേതാക്കള്‍ മലയാളം പാട്ട് പാടിയാല്‍ എങ്ങനെയിരിക്കും അതാണ് ട്രോള്‍ വീഡിയോ രൂപത്തില്‍ ഇറങ്ങിയിരിക്കുന്നത്.
ഉഡായിപ്പിന്റെ ഉസ്താദ് എന്ന ഗ്രൂപ്പാണ് ഈ മാഷപ്പ് വീഡിയോകള്‍ക്ക് പിന്നില്‍. പച്ചക്കറിക്കായ തട്ടില്‍ എന്ന പാട്ടുപാടി എത്തിയിരിക്കുന്നത് അമേരിക്കന്‍ പ്രസിഡന്റ് ഡൊണാള്‍ഡ് ട്രംപാണ്. മന്ദാരച്ചെപ്പുണ്ടോ മാണിക്യക്കല്ലുണ്ടോ എന്ന സൂപ്പര്‍ഹിറ്റ് ഗാനം ആലപിക്കുന്നത് മുന്‍ അമേരിക്കന്‍ പ്രസിഡന്റ് ബരാക് ഒബാമയാണെങ്കില്‍ അല്ലിമലര്‍ക്കാവില്‍ എന്ന പാട്ടുമായി എത്തിയത് മോഡിയാണ്.
സോഷ്യല്‍മീഡിയ ഒന്നടങ്കം ഇരുകൈയ്യും നീട്ടി സ്വീകരിച്ചിരിക്കുന്ന വീഡിയോ, സിനിമയില്‍ ഈ പാട്ടുകളെല്ലാം പാടിയ പിന്നണി ഗായകന്‍ എംജി ശ്രീകുമാറും ഷെയര്‍ ചെയ്തിട്ടുണ്ട്. കൊറോണക്കാലത്ത് പേടിയോടെ വീട്ടിലിരിക്കുന്ന ജനങ്ങള്‍ക്ക് മതിമറന്ന് ചിരിക്കാനുള്ള അവസരമാണ് ഉഡായിപ്പിന്റെ ഉസ്താദ് ഒരുക്കിയിരിക്കുന്നത്.
