ഹൈദരാബാദ്: നടന് അല്ലു അര്ജുന് ജയില് മോചിതനായി. പുഷ്പ 2 പ്രീമിയറിനിടെ തിക്കിലും തിരക്കിലും പെട്ടുണ്ടായ അപകടത്തില് യുവതി മരിച്ച കേസിലാണ് അല്ലു അര്ജുന് കഴിഞ്ഞ ദിവസം അറസ്റ്റിലായത്.
നടന് ഒരു രാത്രി ജയിലില് കഴിഞ്ഞതിനു ശേഷമാണ് ജയില് മോചിതനായത്. കഴിഞ്ഞ ദിവസം തെലങ്കാന ഹൈക്കോടതി നടന് ഇടക്കാല ജാമ്യം അനുവദിച്ചിരുന്നു. എന്നാല് കോടതിയില് നിന്നുള്ള ജാമ്യ ഉത്തരവെത്താന് വൈകിയതോടെയാണ് നടന് ജയിലില് കഴിയേണ്ടിവന്നത്.
ഹൈദരാബാദിലെ ചഞ്ചല്ഗുഡ ജയിലിലെ എ1 ബാരക്കിലാണ് അല്ലു അര്ജുനെ പാര്പ്പിച്ചത്. ഹൈക്കോടതിയില് നിന്നുള്ള ജാമ്യ ഉത്തരവ് ലഭിച്ചിട്ടും അല്ലു അര്ജുനെ മോചിപ്പിച്ചില്ലെന്നും ഇതിനു മറുപടി പറയേണ്ടിവരുമെന്നും നടന്റെ അഭിഭാഷകന് അശോക് റെഡ്ഡി പറഞ്ഞു.
യുവതിയുടെ മരണത്തിന്റെ ഉത്തരവാദിത്വം നടന്റെ തലയില് കെട്ടിവെക്കാനാണ് ശ്രമമെന്നും മോചനം വൈകിയതില് നിയമ നടപടി സ്വീകരിക്കുമെന്നും അഭിഭാഷകന് വ്യക്തമാക്കി. അല്ലു അര്ജുനെ അറസ്റ്റ് ചെയ്തതറിഞ്ഞ് അതിനിടെ ചഞ്ചല്ഗുഡ ജയിലിന് പുറത്ത് താരത്തിന്റെ നിരവധി ആരാധകരാണ് ഒത്തുകൂടിയിരിക്കുന്നത്. പ്രദേശത്ത് കനത്ത പൊലീസ് സുരക്ഷയാണ് ഒരുക്കിയിരിക്കുന്നത്.
Discussion about this post