തിരുവനന്തപുരം: വല്സന് തില്ലങ്കേരിയുടെ വെളിപ്പെടുത്തല് ഞെട്ടിക്കുന്നതെന്ന് പ്രതിപക്ഷ നേതാവ് രമേശ് ചെന്നിത്തല. ചിത്തിര ആട്ട വിശേഷത്തിന് ശബരിമല സന്നിധാനത്ത് ഡ്യൂട്ടിക്കെത്തിയ വനിതാ പൊലീസുകാരുടെ വയസ് തെളിയിക്കുന്ന രേഖകള് ആര്എസ്എസ് പരിശോധിച്ചിരുന്നെന്ന് ആര്എസ്എസ് നേതാവ് വല്സന് തില്ലങ്കരി വെളിപ്പെടുത്തലിനോട് പ്രതികരിക്കുകയായിരുന്നു രമേശ് ചെന്നിത്തല. പൊലീസ് സേനയുടെ ആത്മാഭിമാനം ചോദ്യം ചെയ്യുന്ന നടപടിയാണിതെന്ന് പ്രതിപക്ഷനേതാവ് പറഞ്ഞു. മുഖ്യമന്ത്രി മറുപടി നല്കണമെന്നും ചെന്നിത്തല കൂട്ടിച്ചേര്ത്തു.
സംസ്ഥാന സര്ക്കാരിന്റെ പൂര്ണ്ണ പരാജയമാണ് ഇതിലൂടെ വ്യക്തമാകുന്നത്. അന്ന് സന്നിധാനത്ത് പൊലീസ് പോലും ആര്എസ്എസുകാരുടെ നിയന്ത്രണത്തിലായിരുന്നു എന്നതിന് തെളിവാണിത്. വത്സന് തില്ലങ്കേരി അന്ന് പൊലീസിന്റെ മെഗാഫോണിലൂടെ സംസാരിച്ചു എന്ന് മാത്രമല്ല പൊലീസുകാരുടെ രേഖകള് പരിശോധിക്കുകയും ചെയ്തിരുന്നു എന്നാണ് വ്യക്തമാകുന്നതെന്ന് ചെന്നിത്തല ആരോപിച്ചു.
ശബരിമലയില് വന്സുരക്ഷ ഒരുക്കിയിരുന്നെന്ന് പറയുന്ന സര്ക്കാര് യഥാര്ത്ഥത്തില് ആര്എസ്എസിനും ബിജെപിക്കും മറ്റ് സംഘപരിവാര് ശക്തികള്ക്കും അഴിഞ്ഞാട്ടത്തിനുള്ള ഒത്താശ ചെയ്തു കൊടുക്കുകായാണ് ചെയ്തത്. പരിപാവനമായ പതിനെട്ടാംപടിയില് കയറി നിന്ന് അപമാനിച്ച സംഘപരിവാറുകാര് ഭക്തരെ കയ്യേറ്റം ചെയ്യുകയും ഭീഷണിപ്പെടുത്തുകയും ചെയ്തു. പൊലീസ് അതൊന്നും തടഞ്ഞില്ല. ശബരിമലയെ ആര്എസ്എസിനും ബിജെപിക്കും സംഘപരിവാര് ശക്തികള്ക്കും അടിയറവയ്ക്കുകയാണ് സര്ക്കാര് ചെയ്തതെന്നും രമേശ് ചെന്നിത്തല പറഞ്ഞു.
സംസ്ഥാനത്തെ പൊലീസ് തന്നെ ആര്എസ്എസിന്റെ ചൊല്പ്പടിക്കും ദയാദാക്ഷണ്യത്തിനും വിധേയമായി നില്ക്കേണ്ടി വന്ന അവസ്ഥ ലജ്ജാകരമാണ്. സംസ്ഥാനത്തെ പൊലീസ് സംവിധാനത്തിന്റെ ആത്മാഭിമാനത്തെ ചോദ്യം ചെയ്യുന്ന നടപടിയുമാണിത്. ആഭ്യന്തര വകുപ്പ് കൈകാര്യം ചെയ്യുന്ന മുഖ്യമന്ത്രി ഇതിന് മറുപടി നല്കണമെന്നും അദ്ദേഹം ആവശ്യപ്പെട്ടു.
ചിത്തിര ആട്ട വിശേഷ പൂജകളുമായി ബന്ധപ്പെട്ട് ശബരിമലയില് സുരക്ഷാ ചുമതലകള്ക്കായി എത്തിയ വനിതാ പോലീസ് ഉദ്യോഗസ്ഥകളുടെ പ്രായം പരിശോധിച്ചെന്നും ഉദ്യോഗസ്ഥകളുടെ പ്രായം തെളിയിക്കുന്ന രേഖകളാണ് പരിശോധിച്ചതെന്നും വത്സന് തില്ലങ്കേരി പറഞ്ഞിരുന്നു. മുതലക്കുളത്ത് നടന്ന ശബരിമല സംരക്ഷണ സംഗമത്തില് പ്രസംഗിക്കുക്കുകയായിരുന്നു അദ്ദേഹം.
Discussion about this post