തിരുവനന്തപുരം: രാഹുല് മാങ്കൂട്ടത്തില് എംഎല്എയ്ക്കെതിരെ പീഡനപരാതി നല്കിയ യുവതിയെ സോഷ്യല്മീഡിയയിലൂടെ അധിക്ഷേപിച്ചെന്ന കേസില് കോണ്ഗ്രസ് നേതാവ് സന്ദീപ് വാര്യര്ക്കും രഞ്ജിത പുളിക്കലിനും മുന്കൂര് ജാമ്യം.
ഇരുവര്ക്കും ഉപാധികളോടെ മുന്കൂര്ജാമ്യം അനുവദിച്ചത്. സമാനമായ നടപടികള് ആവര്ത്തിക്കരുത്, അന്വേഷണ ഉദ്യോഗസ്ഥര് വിളിച്ചാല് ഹാജരാകണം തുടങ്ങിയ വ്യവസ്ഥകള് പാലിക്കണമെന്നും കോടതി നിര്ദേശിച്ചു.
തിരുവനന്തപുരം പ്രിന്സിപ്പല് ജില്ലാ സെഷന്സ് ജഡ്ജി എസ് നസീറയാണ് ജാമ്യം അനുവദിച്ചത്. അതിജീവിതയുടെ തിരിച്ചറിയല് വിവരം വെളിപ്പെടുത്തി അപമാനിച്ചുവെന്ന കേസില് ആണ് നടപടി.
അതിജീവിതയെ അപമാനിച്ചിട്ടില്ലെന്നും, ഇവരുടെ വിവാഹത്തില് പങ്കെടുത്ത സാഹചര്യത്തില് പങ്കുവച്ച ഫോട്ടോ ദുരുപയോഗം ചെയ്യുന്നത് ശ്രദ്ധയില്പ്പെട്ടപ്പോള് സാമൂഹ്യമാധ്യമങ്ങളില് നിന്ന് നീക്കം ചെയ്യ്തിട്ടുണ്ടെന്നുമായിരുന്നു സന്ദീപ് വാര്യര് കോടതിയെ അറിയിച്ചത്.
പരാതിക്കാരിയെ അപമാനിക്കുന്ന വിധത്തില് യാതൊരു നീക്കവും താന് നടത്തിയിട്ടില്ലെന്ന് പത്തനംതിട്ടയിലെ മഹിള കോണ്ഗ്രസ് നേതാവായ രഞ്ജിത പുളിക്കലും കോടതിയെ അറിയിച്ചു.
താന് ഉള്പ്പെട്ട വാട്സ്ആപ്പ് ഗ്രൂപ്പില് പരാതിക്കാരിയെ കുറിച്ച് ചര്ച്ച നടന്നിട്ടില്ലെന്നും സ്ത്രീ കൂടിയായ താന് പരാതിക്കാരിയെ ഒരു തരത്തിലും അപമാനിക്കില്ലെന്നുമുള്ള നിലപാട് ആയിരുന്നു രഞ്ജിത പുളിക്കല് സ്വീകരിച്ചത്.
Discussion about this post