കോഴിക്കോട്: അധികൃതർ അറിയാതെ എംബിബിഎസ് ക്ലാസിൽ പ്ലസ് ടു വിദ്യാർത്ഥിനി ഇരുന്നത് നാല് ദിവസം. കോഴിക്കോട് ഗവൺമെന്റ് മെഡിക്കൽ കോളേജിലാണ് സംഭവം. മലപ്പുറം സ്വദേശിനിയായ വിദ്യാർഥിനി തുടർച്ചയായ അഞ്ചാംദിവസം ക്ലാസിൽ ഹാജരാകാതെ വന്നപ്പോഴാണ് സംഭവത്തിന്റെ ചുരുൾ അഴിഞ്ഞത്. മെഡിക്കൽ കോളേജിൽ നവംബർ 29-ന് ഒന്നാംവർഷ വിദ്യാർഥികളുടെ ക്ലാസ് ആരംഭിച്ചു. മൊത്തം 245 പേർക്കാണ് ഇവിടെ പ്രവേശനം ലഭിച്ചത്.
ഇതിനുപുറമെയാണ് പ്ലസ് ടു വിദ്യാർഥിനി കൂടി ക്ലാസിലേയ്ക്ക് കടന്നുകൂടിയത്. എന്നാൽ, നാലുദിവസം കഴിഞ്ഞപ്പോൾ വിദ്യാർഥികളുടെ ഹാജർപട്ടികയും പ്രവേശന രജിസ്റ്ററും തമ്മിൽ താരതമ്യം ചെയ്തപ്പോൾ പൊരുത്ത കേടുകൾ ശ്രദ്ധയിൽപ്പെട്ടു. ഈ കുട്ടിയുടെ പേര് ഹാജർ പട്ടികയിലുണ്ട്. എന്നാൽ, പ്രവേശന രജിസ്റ്ററിൽ ഇല്ല.
നവംബർ 29, 30, ഡിസംബർ ഒന്ന്, രണ്ട് ദിവസങ്ങളിലാണ് ഈ പ്‌ളസ്ടുക്കാരി മെഡിസിൻ ക്‌ളാസിലിരുന്നത്. വാട്‌സാപ്പ് ഗ്രൂപ്പിലും ഫെയ്‌സ് ബുക്കിലുമെല്ലാം പ്ലസ് ടു വിദ്യാർഥിനി തനിക്ക് എം.ബി.ബി.എസിന് കോഴിക്കോട് മെഡിക്കൽ കോളേജിൽ പ്രവേശനം കിട്ടിയതായി കൂട്ടുകാർക്കെല്ലാം സന്ദേശങ്ങളും അയച്ചിട്ടുണ്ട്. പ്രവേശനയോഗ്യതയില്ലാത്ത കുട്ടിയുടെ പേര് എങ്ങനെ ഹാജർപട്ടികയിൽ വന്നെന്ന കാര്യം ഇപ്പോഴും ദുരൂഹമായി തുടരുകയാണ്.
Discussion about this post