തൊടുപുഴ: പ്രാര്ത്ഥനകളെ വിഫലമാക്കി തൊടുപുഴയില് അമ്മയുടെ സുഹൃത്തിന്റെ ക്രൂരമര്ദ്ദനത്തിന് ഇരയായ ഏഴുവയസുകാരന് മരണത്തിന് കീഴടങ്ങി. കോലഞ്ചേരി മെഡിക്കല് കോളേജില് കഴിഞ്ഞ പത്തു ദിവസങ്ങളിലായി ചികിത്സയിലായിരുന്നു കുട്ടി. വെന്റിലേറ്ററിന്റെ സഹായത്തോടെയായിരുന്നു ജീവന് നിലനിര്ത്തിയിരുന്നത്. തലച്ചോറിനേറ്റ ഗുരുതരമായ പരിക്കാണ് കുട്ടിയുടെ നില ഗുരുതരമാക്കിയത്. തലച്ചോറിന്റെ പ്രവര്ത്തനം 90 ശതമാനവും നിലച്ചതോടെ ചികിത്സയുടെ പത്താംദിനത്തില് പ്രതീക്ഷകള് അവസാനിപ്പിച്ച് ഏഴുവയസുകാരന് വിധിക്ക് കീഴടങ്ങുകയായിരുന്നു.
തലയ്ക്ക് ഗുരുതരമായി പരിക്കേറ്റ നിലയില് ആദ്യം തൊടുപുഴ ആശുപത്രിയിലും പിന്നീട് കോലഞ്ചേരി മെഡിക്കല് കോളേജിലേക്കും മാറ്റുകയായിരുന്നു. ചികിത്സയുടെ തുടക്കം മുതല് മരുന്നുകളോട് കുട്ടിയുടെ ശരീരം പ്രതികരിച്ചിരുന്നില്ല. കഴിഞ്ഞ ആഴ്ച കുട്ടിക്ക് മസ്തിഷ്ക മരണം സംഭവിച്ചിരുന്നു. എട്ടുദിവസമായി വെന്റിലേറ്ററിലായിരുന്നു കുട്ടി. മൃതദേഹം മോര്ച്ചറിയിലേക്ക് മാറ്റി. കോട്ടയം മെഡിക്കല് കോളേജിലേക്ക് പോസ്റ്റ്മോര്ട്ടത്തിനായി കൊണ്ടുപോയേക്കും.
അതേസമയം, മനസാക്ഷിയെ പോലും മരവിപ്പിക്കുന്ന തരത്തില് കുട്ടിയെ ക്രൂര മര്ദ്ദനത്തിനിരയാക്കിയ അമ്മയുടെ സുഹൃത്ത് അരുണ് ആനന്ദിനെ പോലീസ് അറസ്റ്റു ചെയ്തിരുന്നു. ഇപ്പോള് തൊടുപുഴ പോലീസിന്റെ റിമാന്ഡിലാണ് ഇയാള്. നേരത്തെ ബാലാവകാശ കമ്മീഷന് ഇടപെട്ടിരുന്നു. കേരളാ ഹൈക്കോടതി പ്രതിക്കെതിരെ സ്വമേധയാ കേസെടുക്കുകയും ചെയ്തു. അമ്മയെ സാക്ഷിയാക്കി കേസ് രജിസ്റ്റര് ചെയ്യാനാണ് പോലീസ് നീക്കം.
കഴിഞ്ഞ മേയ് മാസത്തിലാണ് കുട്ടിയുടെ പിതാവ് ബിജു മരിച്ചത്. പിന്നീട് ബിജുവിന്റെ ബന്ധുവായ അരുണ് ആനന്ദിനൊപ്പമാണ് കുട്ടിയുടെ അമ്മ കഴിഞ്ഞിരുന്നത്. രണ്ട് മക്കളും ഇവരുടെ കൂടെയായിരുന്നു. ഏഴുവയസുകാരന്റെ ഇളയസഹോദരന് നാലുവയസുകാരനും ക്രൂരമര്ദ്ദനങ്ങള്ക്ക് ഇരയായിരുന്നതായും പട്ടിണിക്കിട്ടിരുന്നതായും റിപ്പോര്ട്ടുകളുണ്ട്.
Discussion about this post