ഇന്ന് എല്ലാവരും മദേഴ്സ് ഡേ ആഘോഷിക്കുന്ന തിരക്കിലാണ്. സോഷ്യല് മീഡിയയില് അമ്മ ദൈവമാണ് എന്നൊക്കെ പറഞ്ഞ് പലതരത്തിലുള്ള പോസ്റ്ററുകളാണ് സോഷ്യല് മീഡിയയില് പ്രത്യക്ഷപ്പെട്ടിരിക്കുന്നത്. ഒരുപക്ഷേ ഇവരൊക്കെ ഈ ദിവസത്തില് മാത്രമാണ് അമ്മയെ ഓര്ക്കുന്നത് എന്നാണ് പോസ്റ്റുകള് കണ്ടാല് തോന്നുക. ഇത്തരത്തില് പോസ്റ്റ് ഇടുന്നവര്ക്ക് ഒരു ഓര്മ്മപ്പെടുത്തലാണ് അവതാരകനും റേഡിയോ ജോക്കിയുമായ മാത്തുക്കുട്ടിയുടെ കുറിപ്പ്. അടുക്കളയില് കഴുകാന് കൂട്ടിയിട്ടിരിക്കുന്ന പാത്രങ്ങളുടെ ചിത്രം പങ്കുവെച്ചുള്ള മാത്തുക്കുട്ടിയുടെ കുറിപ്പ് ഇപ്പോള് സോഷ്യല് മീഡിയയില് വൈറലാണ്.
മാത്തുക്കുട്ടി ഇന്സ്റ്റഗ്രാമില് പങ്കുവെച്ച കുറിപ്പിന്റെ പൂര്ണ്ണരൂപം,
ഈ ഫോട്ടോ അത്ര നല്ലതല്ലെന്ന് എനിക്കറിയാം. പക്ഷെ ഇതില് ഞാനിന്ന് രാവിലെ കുടിച്ച ചായക്കപ്പ് മുതല് ഉച്ചയൂണിന്റെ പ്ലേറ്റ് വരെയുണ്ട്. വൈകുന്നേരമാവുമ്പോഴേക്കും ഇത് ഇരട്ടിയാവും. അത്താഴമുണ്ട് നമ്മള് ഗെയിം ഓഫ് ത്രോണ്സിന്റെ അവസാന സീസണിലേക്കും വാട്സാപ്പ് ചാറ്റിന്റെ കുറുകലുകളിലേക്കും കമിഴ്ന്ന് വീഴുമ്പോള് നമ്മുടെ അമ്മമാരെവിടെ എന്ന് ചിന്തിച്ചിട്ടുണ്ടോ?അവരിവിടെയാണ്, കാണുമ്പോള് തന്നെ നമുക്ക് സ്ക്രോള് ചെയ്ത് കളയാന് തോന്നുന്ന ഈ വിഴുപ്പ് പാത്രങ്ങള്ക്ക് മുന്പില്. ആലോചിക്കുമ്പോള് നാണക്കേട് തോന്നുന്നുണ്ട്. ഉണ്ട പാത്രം പോലും കഴുകി വെക്കാതെ അമ്മക്ക് ആശംസകള് നേരാന് ചെന്നിരിക്കുന്നു. എന്നേപ്പോലെയുള്ളവരെ എച്ചില് കഴുകാത്ത കൈ കൊണ്ട് തല്ലുകയാണ് വേണ്ടത്.
Discussion about this post