മെക്സിക്കോ: അഴുക്കുചാലുകള് വൃത്തിയാക്കുന്നതിനിടെ തൊഴിലാളികള് കണ്ടെടുത്തത് രാക്ഷസ എലിയെ. എലിക്ക് ഒരാള് പൊക്കത്തിലധികം വലുപ്പമുണ്ടായിരുന്നു. ഭീമന് എലിയെ അഴുക്കു ചാലില് നിന്നും കണ്ടെത്തിയ വിവരമറിഞ്ഞ് നാട്ടുകാരെല്ലാം ഓടിയെത്തി.
എലിയെ കണ്ട് പലരും അമ്പരന്നു. എന്നാല് പിന്നീടാണ് കാര്യം മനസ്സിലായത്. അഴുക്കുചാലില് നിന്നും കിട്ടിയത് ജീവനുള്ളതെന്ന് തോന്നിപ്പിക്കുന്ന തരത്തിലുള്ള എലിയുടെ ഒരു വമ്പന് പാവയെയാണ് ഹാലോവീന് പരിപാടികള്ക്ക് വേണ്ടി തയാറാക്കിയ കൂറ്റന് എലി പാവയായിരുന്നു അത്.
പരിപാടി കഴിഞ്ഞ് ഉപേക്ഷിച്ച പാവ അഴുക്കു ചാലില് വന്നടിയുകയായിരുന്നു. ഓട വൃത്തിയാക്കുന്നതിനിടെ ഇത്രയും കൗതുകകരമായ ഒരു വസ്തു കണ്ടെത്തുമെന്ന് തൊഴിലാളികളും പ്രതീക്ഷിച്ചിരുന്നില്ല. ആദ്യം എലിയെ കണ്ട് തൊഴിലാളികളൊന്ന് ഞെട്ടിയെങ്കിലും പിന്നീട് അതിനെ പുറത്തെടുത്തു.
ചെളിയില് കുളിച്ച പാവയെ പിന്നീട് തൊഴിലാളികള് തന്നെ വെള്ളമൊഴിച്ചു കഴുകി വൃത്തിയാക്കുകയും ചെയ്തു. വിചിത്രമായ ഈ പാവയുടെ ദൃശ്യങ്ങള് സമീപം നിന്നവരാണ് മൊബൈല് ക്യാമറയില് പകര്ത്തി സോഷ്യല്മീഡിയയില് പങ്കുവെച്ചത്. ഇപ്പോള് രാക്ഷസ എലിയുടെ ദൃശ്യം വ്യാപകമായി പ്രചരിക്കുകയാണ്.
ദൃശ്യം സമൂഹമാധ്യമങ്ങളില് എത്തിയതോടെ ഉടമസ്ഥത അവകാശപ്പെട്ടുകൊണ്ട് എവിലിന് ലോപ്പസ് എന്ന വ്യക്തി രംഗത്തെത്തി. ഹാലോവീനുമായി ബന്ധപ്പെട്ട അലങ്കാരങ്ങള്ക്ക് വേണ്ടി ഏതാനും വര്ഷങ്ങള്ക്കു മുന്പ് താന് കുമ്മായം ഉപയോഗിച്ച് നിര്മിച്ച പാവയാണിതെന്ന് എവിലിന് പറയുന്നു.
മഴവെള്ളത്തില് പാവ ഒലിച്ചു പോയിരുന്നതായും അഴുക്കുചാലില് തിരയുന്നതിനായി ആരുംതന്നെ സഹായിച്ചില്ലെന്നും അവര് പറഞ്ഞു. എന്നാല് ഇത്രയും കാലം അഴുക്കുചാലില് കിടന്ന പാവയെ ഇനി തിരികെ എവിലിന് ഏറ്റെടുക്കുമോ എന്ന കാര്യം വ്യക്തമല്ല.
Discussion about this post