തിരുവനന്തപുരം: ലളിതകലാ അക്കാദമിയുടെ പുരസ്കാരം നേടിയ കാര്ട്ടൂണിന്റെ പേരില് വിവാദം കത്തുന്നതിനിടെ അക്കാദമി സെക്രട്ടറി പൊന്ന്യന് ചന്ദ്രന് വധഭീഷണി. ഭീഷണിയുടെ പശ്ചാത്തലത്തില് സെക്രട്ടറി തൃശൂര് ഈസ്റ്റ് പോലീസ് സ്റ്റേഷനില് പരാതി നല്കി.
കാര്ട്ടൂണ് വിവാദമായ പശ്ചാത്തലത്തില് അവാര്ഡ് പുനഃപരിശോധിക്കാന് സര്ക്കാര് നിര്ദേശിച്ചിരുന്നു. ക്രിസ്ത്യന് മതവികാരത്തെ അവഹേളിക്കുന്ന കാര്ട്ടൂണിനെ സര്ക്കാര് അംഗീകരിക്കുന്നില്ല. അവാര്ഡ് നിര്ണയ ജൂറിക്ക് വീഴ്ച സംഭവിച്ചോ എന്ന് അക്കാദമി പരിശോധിക്കട്ടെ എന്നും സാംസ്കാരിക മന്ത്രി പ്രതികരിച്ചിരുന്നു.
വിഷയത്തില് അക്കാദമി ചെയര്മാന് നേമം പുഷ്പരാജും പ്രതികരിച്ചിരുന്നു. അവാര്ഡ് പുനഃപരിശോധിക്കുമെന്നും കാര്ട്ടൂണ് മതപരമായ ചിഹ്നങ്ങളെ അവഹേളിച്ചുവെന്ന് തന്നെയാണ് അക്കാദമിയും വിലയിരുത്തുന്നതെന്നും നേമം പുഷ്പരാജ് പറഞ്ഞു. സുഭാഷ് കെകെ വരച്ച കാര്ട്ടൂണാണ് സമൂഹ മാധ്യമങ്ങളില് വലിയ പ്രതിഷേധം ഏറ്റുവാങ്ങിയത്.
പൂവന് കോഴിക്ക് ഫ്രാങ്കോയുടെ മുഖം, കോഴിയുടെ നില്പ്പ് പോലീസിന്റെ തൊപ്പിക്ക് മുകളിലും തൊപ്പി പിടിക്കുന്നത് പിസി ജോര്ജ്ജും ഷൊര്ണ്ണൂര് എംഎല്എ പികെ ശശിയും എന്നതായിരുന്നു കാര്ട്ടൂണ്.
പീഡന കേസില് പ്രതിചേര്ക്കപ്പെട്ട ബിഷപ്പ് ഫ്രാങ്കോയുടെ കയ്യിലെ മെത്രാന് സ്ഥാനീയ ചിഹ്നത്തില് അടിവസ്ത്രത്തിന്റെ ചിത്രം ചേര്ത്തിരുന്നു. ഇതാണ് വിവാദങ്ങള്ക്ക് വഴിവെച്ചത്. കേരള ശബ്ദത്തിന്റെ സഹ പ്രസിദ്ധീകരണമായ ഹാസ്യകൈരളിയിലാണ് കാര്ട്ടൂണ് പ്രസിദ്ധീകരിച്ചിരുന്നത്.
Discussion about this post