ന്യൂഡല്ഹി: നിപ്പാ വൈറസ് ബാധയുണ്ടെന്ന സംശയത്തെ തുടര്ന്ന് ഐസൊലേഷന് വാര്ഡില് പ്രവേശിപ്പിച്ച ആറ് പേര്ക്കും നിപ്പാ ബാധയില്ലെന്ന് സ്ഥിരീകരണം. പൂനെ വൈറോളജി ഇന്സ്റ്റിറ്റ്യൂട്ടിലെ പരിശോധനാ ഫലത്തിലാണ് വൈറസ് ബാധയില്ലെന്ന് സ്ഥിരീകരണം വന്നത്. ആറ് പേരുടേയും സാമ്പിളുകള് ഇന്നലെ പരിശോധനയ്ക്ക് അയച്ചിരുന്നു. ഇതോടെ നിലവില് സ്വകാര്യ ആശുപത്രിയില് കഴിയുന്ന വിദ്യാര്ത്ഥിക്ക് മാത്രമാണ് നിപ്പാ സ്ഥിരീകരിച്ചിട്ടുള്ളതെന്ന് വ്യക്തമായി.
വിദ്യാര്ത്ഥിയോട് അടുത്ത് ഇടപെട്ട രണ്ട് പേരും രണ്ട് നേഴ്സുമാരും അടക്കം ആറ് പേരാണ് ഐസൊലേഷന് വാര്ഡില് കഴിയുന്നത്. ഇവരുടെ സാമ്പിളുകളാണ് പൂനെ വൈറോളജി ഇന്സ്റ്റിറ്റ്യൂട്ടിലേക്ക് അയച്ചത്. വിദ്യാര്ത്ഥിയോട് അടുത്ത സമ്പര്ക്കം പുലര്ത്തിയ ആറ് പേര്ക്കും നിപാ ബാധയില്ലെന്ന സ്ഥിരീകരണം വലിയ ആശ്വാസത്തോടെയാണ് ആരോഗ്യ വകുപ്പ് കാണുന്നത്.
ആശങ്കയ്ക്ക് അടിസ്ഥാനമില്ലെന്നും സ്ഥിതി നിയന്ത്രണ വിധേയമാണെന്നും സംസ്ഥാന ആരോഗ്യ വകുപ്പ് അധികൃതര് വിശദീകരിക്കുന്നു. അതേസമയം, രോഗ വ്യാപനം തടയാനും പ്രതിരോധ ബോധവത്കരണ പ്രവര്ത്തനങ്ങള്ക്കും വിപുലമായ സംവിധാനങ്ങളാണ് സംസ്ഥാനത്ത് ഉടനീളം പ്രവര്ത്തിക്കുന്നത്. വൈകീട്ട് മൂന്ന് മണിക്ക് മുഖ്യമന്ത്രിയുടെ സാന്നിധ്യത്തില് എറണാകുളത്ത് അവലോകന യോഗം ചേരും.
Discussion about this post