കോഴിക്കോട്: എസ്എസ്എല്സി റിസല്ട്ട് വന്നപ്പോള് മലപ്പുറം ജില്ലയിലെ തെന്നല കളത്തിങ്ങല് അബ്ദുല് നാസറിന്റെയും സെലീനയുടെയും മകളായ ഷഹാന ഫുള് എ പ്ലസ് സ്വന്തമാക്കിയിരുന്നു. ഷഹാനയുടെ നേട്ടത്തില് തോറ്റത് കാന്സര് ആണ്. രക്താര്ബുദത്തെ വകവെയ്ക്കാതെ ആംബുലന്സില് പോയാണ് ഷഹാന പരീക്ഷ എഴുതിയത്.
ഫലം വന്നപ്പോള് എല്ലാ വിഷയങ്ങള്ക്കും എ പ്ലസ് നേടി. കഴിഞ്ഞ ദിവസം ആശുപത്രിക്കിടക്കയിലുള്ള അവളെക്കാണാന് സംവിധായകന് ശ്രീകുമാര് മേനോനെത്തിയിരുന്നു. അവള്ക്ക് ഒരു ടാബ്ലറ്റും അദ്ദേഹം സമ്മാനിച്ചു. അവളെക്കണ്ട് മടങ്ങിയതിന് ശേഷം അവളെപ്പറ്റി തന്റെ ഔദ്യോഗിക ഫേസ്ബുക്ക് അക്കൗണ്ടില് ഒരു കുറിപ്പും പോസ്റ്റ് ചെയ്തിട്ടുണ്ട്.
താനിന്നലെ കോഴിക്കോട് എംവിആര് ക്യാന്സര് സെന്ററില് വെച്ച് ഷഹാനയെ കണ്ടെന്നും ഒരുപാട് വേദന അനുഭവിക്കുമ്പോഴും അവളുടെ മുഖത്തു നിന്നും ചിരി മായുന്നില്ലയെന്നും അദ്ദേഹം കുറിപ്പില് പറയുന്നു.താനവള്ക്ക് ഒരു ചെറിയ സമ്മാനം കൊടുത്തു. ഒരു ടാബ്ലറ്റ്. അത്യാഹ്ലാദമുള്ള സര്പ്രൈസ് എന്താണെന്നു വെച്ചാല്; അവളുടെ കയ്യില് ടാബ് ഉണ്ടായിരുന്നു. രണ്ട് ദിവസം മുന്നേ അത് കേടു വന്നു. അതിന്റെ പേരില് സഹോദരനുമായവള് ദേഷ്യപ്പെട്ടിരിക്കുമ്പോഴാണ് അതേപോലൊരു ടാബ് തന്നെ സമ്മാനമായി കിട്ടിയത്. സമ്മാനം ആ മുഖത്ത് വലിയ സന്തോഷമുണ്ടാക്കി. എനിക്കും സന്തോഷമായി. ടാബിന്റെ യാദൃശ്ചികത ഞങ്ങള് രണ്ടാള്ക്കും അല്ഭുതമായെന്നും അദ്ദേഹം കുറിച്ചു.
ഫേസ്ബുക്ക് പോസ്റ്റിന്റെ പൂര്ണ്ണ രൂപം
‘ഇന്നലെ ഞാന് #ഫാത്തിമ_ഷഹാനയെ കണ്ടു. കോഴിക്കോട് എംവിആര് ക്യാന്സര് സെന്ററില് വെച്ച്. ഒരുപാട് വേദന അനുഭവിക്കുമ്പോഴും അവളുടെ മുഖത്തു നിന്നും ചിരി മായുന്നില്ല.രക്താര്ബുദത്തെ തുടര്ന്ന് കീമോതെറാപ്പിക്കിടയില് ആംബുലന്സില് പോയാണ് ഷഹാന പത്താം ക്ലാസ് പരീക്ഷ എഴുതിയത്.അവള് എന്നോട് ചോദിച്ചു- ”എന്നെ മന്ത്രി വിളിച്ചിരുന്നു. എന്നെക്കാണാന് പത്രക്കാര് വരുന്നു. ഇപ്പോ അങ്കിളും വന്നു. എനിക്ക് അസുഖമുള്ളതു കൊണ്ടായിരിക്കുമല്ലേ എല്ലാവരും വരണത്?’
അപ്പോ, ഞാനവളോട് പറഞ്ഞു, അസുഖമുള്ളതു കൊണ്ടല്ല. പുഞ്ചിരി കൊണ്ട് നീ അസുഖത്തെ അതിജീവിച്ചില്ലേ…എന്നിട്ട് ഇത്രയും വലിയ നേട്ടമുണ്ടാക്കിയില്ല നീ… പത്തില്_എല്ലാ_വിഷയത്തിലും_എ_പ്ലസ്! ആ അതിജീവനത്താലാണ് എല്ലാവരും കാണാന് വരുന്നത്. അഭിനന്ദിക്കുന്നത്.
അപ്പോള്, അവള്ക്ക് സന്തോഷമായി,അവള് ഒടിയന് കണ്ടിട്ടുണ്ട് എന്ന് എന്നോട് പറഞ്ഞു. വല്ലാതെ ഇഷ്ടപ്പെട്ടെന്നും പറഞ്ഞു.ഞാനവള്ക്ക് ഒരു ചെറിയ സമ്മാനം കൊടുത്തു. ഒരു ടാബ്ലറ്റ്. അത്യാഹ്ലാദമുള്ള സര്പ്രൈസ് എന്താണെന്നു വെച്ചാല്; അവളുടെ കയ്യില് ടാബ് ഉണ്ടായിരുന്നു. രണ്ട് ദിവസം മുന്നേ അത് കേടു വന്നു. അതിന്റെ പേരില് സഹോദരനുമായവള് ദേഷ്യപ്പെട്ടിരിക്കുമ്പോഴാണ് അതേപോലൊരു ടാബ് തന്നെ സമ്മാനമായി കിട്ടിയത്. സമ്മാനം ആ മുഖത്ത് വലിയ സന്തോഷമുണ്ടാക്കി. എനിക്കും സന്തോഷമായി. ടാബിന്റെ യാദൃശ്ചികത ഞങ്ങള് രണ്ടാള്ക്കും അല്ഭുതമായി.
ജഗദീശ്വരന് ഈ മിടുക്കിയുടെ അസുഖം പെട്ടന്നു ഭേദമാക്കട്ടെ. എല്ലാ കുട്ടികളെ പോലെയും പ്ലസ്ടുവിനും ഡിഗ്രികളിലുമെല്ലാം ഇതേ നേട്ടം ഉണ്ടാകട്ടെ.പാട്ടു പാടി കൂട്ടുകുടി ഉല്ലസിച്ചിരിക്കാന് അവള്ക്കാവട്ടെ എന്ന പ്രാര്ത്ഥനയോടെയാണ് ഞാന് ക്യാന്സര് സെന്ററിലെ മുറിവിട്ടിറങ്ങിയത്… തിരിഞ്ഞു നോക്കിയില്ല; പിന്നില് ആ പുഞ്ചിരിയുണ്ടാകുമെന്ന് ഉറപ്പായിരുന്നു…എംവിആര് ക്യാന്സര് സെന്റര് എന്ന മഹത്തായ സ്ഥാപനത്തിലെ ഡോക്ടര്മാരുടെയും സപ്പോര്ട്ടിങ് സ്റ്റാഫിന്റെയും അകമഴിഞ്ഞ ആത്മാര്ത്ഥതയും നന്മയും അവിടെ എല്ലായിടവുമുണ്ട്. ക്യാന്സര് ദേദമാക്കുന്നതില് ലോകത്തെ ഏറ്റവും മികച്ച ഒരു ആതുരാലയമായി ഇത് മാറും എന്ന, ചെയര്മാന് ശ്രീ വിജയകൃഷ്ണന്റെ സ്വപ്നം സാക്ഷാത്കരിക്കപ്പെടും എന്ന കാര്യത്തില് എനിക്കും അവിടെ ചികിത്സ തേടി എത്തുന്നവര്ക്കും സംശയം ഒട്ടുമില്ല…
Discussion about this post