തൃശൂര്: കേന്ദ്രമന്ത്രി സുരേഷ് ഗോപിക്കെതിരെ പോലീസില് പരാതി നല്കി ടിഎന് പ്രതാപന്. കഴിഞ്ഞ ലോക്സഭാ തെരഞ്ഞെടുപ്പിനു തൊട്ടുമുമ്പായി സുരേഷ് ഗോപി തൃശൂരിലേക്ക് വോട്ട് മാറ്റി ചേര്ത്തത് നിയമവിരുദ്ധവും ക്രിമിനല് ഗൂഢാലോചനയുമാണെന്നാണ് പരാതി.
തിരുവനന്തപുരത്ത് സ്ഥിര താമസക്കാരനായ സുരേഷ് ഗോപി വ്യാജ സത്യപ്രസ്താവന ഉള്പ്പെടെ ബോധിപ്പിച്ച് നിയമവിരുദ്ധ മാര്ഗ്ഗത്തിലൂടെയാണ് തൃശൂര് നിയമസഭാ മണ്ഡലത്തില് വോട്ട് ചേര്ത്തതെന്ന് പരാതിയില് പറയുന്നു.
തൃശൂര് നിയമസഭാ മണ്ഡലത്തിലെ 115 -ാം നമ്പര് ബൂത്തിലാണ് വോട്ട് ചേര്ത്തത്. ജനപ്രാതിനിധ്യ നിയമം അനുസരിച്ച് സ്ഥിര താമസക്കാരനായ വ്യക്തിക്ക് മാത്രമേ ആ ബൂത്തില് വോട്ട് ചേര്ക്കാന് സാധിക്കുകയുള്ളൂ. പതിറ്റാണ്ടുകളായി സുരേഷ് ഗോപിയും കുടുംബവും തിരുവനന്തപുരം നിയമസഭാ മണ്ഡലത്തിലെ ശാസ്തമംഗലം ഡിവിഷനിലെ 22/1788 എന്ന വീട്ടുനമ്പറില് സ്ഥിര താമസക്കാരനാണ്.
തിരുവനന്തപുരം കോര്പറേഷന് ശാസ്തമംഗലം ഡിവിഷനില് അദ്ദേഹത്തിന്റെയും കുടുംബാംഗങ്ങളുടേയും പേരുകള് അദ്ദേഹം കേന്ദ്രമന്ത്രിയായതിനുശേഷം നടന്ന റിവിഷനിലും അതേ പടി തുടരുന്നുവെന്നത് അദ്ദേഹം നടത്തിയ കൃത്രിമത്തിന് തെളിവാണ്.
സുരേഷ് ഗോപി 2024 ലെ ലോക്സഭ തെരഞ്ഞെടുപ്പിന്നു തൊട്ടു മുന്പായിട്ടാണ് 115 -ാം നമ്പര് ബൂത്തില് ഏറ്റവും അവസാനമായി വോട്ട് ചേര്ത്തത്. വോട്ട് ചേര്ക്കുമ്പോള് സ്ഥിര താമസക്കാരനണെന്ന രേഖയും സത്യ പ്രസ്താവനയും നല്കണം. ശാസ്തമംഗലം ഡിവിഷനില് സ്ഥിര താമക്കാരനായ സുരേഷ് ഗോപി തൃശൂരില് നല്കിയ സത്യ പ്രസ്താവനയും രേഖയും സത്യമല്ലെന്ന് ഇതോടെ തെളിഞ്ഞിരിക്കുകയാണെന്നും അദ്ദേഹം പറഞ്ഞു.
Discussion about this post