മലപ്പുറം:കടുവയുടെ വ്യാജ ദൃശ്യങ്ങള് പ്രചരിപ്പിച്ച് നാട്ടുകാരെ ആശങ്കയിലാക്കിയ യുവാവ് അറസ്റ്റില്. മലപ്പുറത്ത് ആണ് സംഭവം. കരുവാരക്കുണ്ട് മണിക്കനാംപറമ്പില് ജെറിനെയാണ് പോലീസ് അറസ്റ്റ് ചെയ്തത്.
വനംവകുപ്പിന്റെ പരാതിയില് കരുവാരക്കുണ്ട് പൊലീസ്
ആണ് അറസ്റ്റ് ചെയ്തത്. അനാവശ്യ ഭീതിപടര്ത്തുക, ഉദ്യോഗസ്ഥരെ തെറ്റിദ്ധരിപ്പിക്കുക, തുടങ്ങിയ കുറ്റങ്ങളാണ് ജെറിനെതിരെ ചുമത്തിയിരിക്കുന്നത്.
വനംവകുപ്പുമായി ചര്ച്ച ചെയ്ത ശേഷം ജാമ്യമില്ലാ വകുപ്പുകള് ഉള്പ്പെടെ ചുമത്തുമെന്ന് പൊലീസ് പറഞ്ഞു. കരുവാരക്കുണ്ട് തേയില തോട്ടത്തിന് സമീപത്തുനിന്ന് ശനിയാഴ്ച പകര്ത്തിയതാണെന്ന രീതിയിലായിരുന്നു കടുവയുടെ വീഡിയോ ജെറിന് പ്രചരിപ്പിച്ചത്.
കടുവയുടെ വീഡിയോ പ്രചരിച്ചതോടെ നാട്ടുകാരും ആശങ്കയിലായിരുന്നു. തുടര്ന്ന വനം വകുപ്പ് നിരീക്ഷണം ശക്തമാക്കുകയും ചെയ്തിരുന്നു. എന്നാൽ കടുവയുടെതെന്ന് തോന്നിക്കുന്ന കാല്പ്പാടുകളോ മറ്റ് അടയാളങ്ങളോ കണ്ടത്താന് ഉദ്യോഗസ്ഥർക്ക് കഴിഞ്ഞില്ല.
ഇതോടെ ജെറിനെ വനം വകുപ്പ് ഉദ്യോഗസ്ഥര് ചോദ്യം ചെയ്യുകയായിരുന്നു. ആദ്യം താന് പകര്ത്തിയതാണെന്ന് പറഞ്ഞെങ്കിലും കൂടുതല് ചോദ്യം ചെയ്തതോടെ വീഡിയോ എഡിറ്റ് ചെയ്തതാണെന്ന് ജെറിന് സമ്മതിക്കുകയായിരുന്നു.
Discussion about this post