തിരുവനന്തപുരം: കേരളത്തെ ഒന്നടങ്കം ഭീതിയിലാഴ്ത്തിയ പ്രകൃതിദുരന്തങ്ങളിലെ രക്ഷാപ്രവര്ത്തനത്തിന് ചെലവായ തുക തിരിച്ചടക്കണമെന്ന കേന്ദ്രത്തിന്റെ കത്ത് പുറത്ത് വന്നിരുന്നു. 2019ലെ പ്രളയം മുതല് വയനാട് ദുരന്തം വരെയുള്ള ദുരന്തമുഖത്തെ എയര്ലിഫ്റ്റിങ് രക്ഷാദൗത്യത്തിന് ചെലവായ തുക തിരിച്ചടക്കണമെന്നാണ് കത്തില് ആവശ്യപ്പെട്ടത്.
തുക അടിയന്തരമായി തിരിച്ചടയ്ക്കണമെന്ന് കാണിച്ച് കേന്ദ്രം കത്ത് നല്കിയ നടപടി കേരളത്തോടുള്ള കടുത്ത വിവേചനമാണെന്നാണ് സംസ്ഥാന സര്ക്കാര് വ്യക്തമാക്കുന്നത്. അതേസമയം, രക്ഷാദൗത്യത്തിന് ചെലവായ തുക ഒഴിവാക്കി തരണമെന്ന് കേരളം കേന്ദ്രത്തോട് വീണ്ടും ആവശ്യപ്പെടും.
കേന്ദ്രത്തിന്റെ നടപടിയെ രാഷ്ട്രീയമായി തന്നെ നേരിടാനാണ് സര്ക്കാര് തീരുമാനിച്ചിരിക്കുന്നത്. കേന്ദ്രം കനിഞ്ഞില്ലെങ്കില് തുക അടക്കാതെ വെറെ വഴിയില്ലെന്നും എസ്ഡിആര്എഫില് നിന്ന് പണം അടച്ചാല് പ്രതിസന്ധി രൂക്ഷമാകുമെന്നും റവന്യു മന്ത്രി കെ രാജന് പറഞ്ഞു.
കേന്ദ്രത്തിന്റേത് മര്യാദകേടാണ്. തുക തിരിച്ചടയ്ക്കണമെന്ന് വീണ്ടും വീണ്ടും സമ്മര്ദം ചെലുത്തിയാല് എസ്ഡിആര്എഫില് നിന്ന് തുക നല്കേണ്ടതിനെക്കുറിച്ച് ആലോചിക്കുമെന്നും ദുരന്ത മുഖത്ത് കേന്ദ്രം നല്കുന്ന സേവനങ്ങള്ക്കും കേന്ദ്ര ഏജന്സികളുടെ സേവനങ്ങള്ക്കും കേന്ദ്രം തന്നെ തുക എടുക്കുന്നതാണ് നല്ലതെന്നും മന്ത്രി വ്യക്തമാക്കി.
അതല്ലാതെ സംസ്ഥാന എസ്ഡിആര്എഫില് നിന്ന് എടുത്ത് കേന്ദ്രത്തിന് നല്കാന് പറയുന്നത് പ്രയോഗികമായി ശരിയായ നടപടിയല്ല. അതാത് സംസ്ഥാനങ്ങളാണ് തുക വഹിക്കേണ്ടതെങ്കിലും അതിന് തുല്യമായ തുക കേന്ദ്രം നല്കേണ്ടതുമാണെന്നും മന്ത്രി കൂട്ടിച്ചേര്ത്തു.
Discussion about this post