കോഴിക്കോട്: പ്രിയപ്പെട്ടവരുടെ പ്രാര്ത്ഥനകളെല്ലാം വിഫലമായി, നീണ്ട കാത്തിരിപ്പിനൊടുവില് പിറന്ന കണ്മണികളെ തനിച്ചാക്കി ശ്രുതി ടീച്ചര് മറ്റൊരു ലോകത്തേക്ക്് യാത്രയായി. കൂത്താളിയിലെ റിട്ട. ഹെല്ത്ത് ഇന്സ്പക്ടര് കല്ലാട്ട് മീത്തല് ഒ സി നാരായണന് നായരുടെ മകളും പേരാമ്പ്ര സിര്വര് കോളേജ് അധ്യാപികയുമായ ശ്രുതി പ്രസൂണ് (33) ആണ് ദേഹാസ്വസ്ഥതയെ തുടര്ന്ന് ചികിത്സയിലിരിക്കെ മരിച്ചത്.
കോഴിക്കോട് ഒരു സ്വകാര്യ ആശുപത്രിയില് വെച്ചായിരുന്നു മരിച്ചത്. പ്രസവത്തിനായി സ്വകാര്യ ആശുപത്രിയില് പ്രവേശിപ്പിച്ച ശ്രുതി രണ്ട് കുരുന്നുകള്ക്ക് ജന്മം നല്കി. ആശുപത്രിയില് കഴിയുന്നതിനിടയില് പത്ത് ദിവസത്തിന് ശേഷം ശ്രുതിക്ക് ദേഹാസ്വാസ്ഥ്യം അനുഭവപ്പെടുകയായിരുന്നു.
തുടര്ന്ന് ഹൃദയശസ്ത്രക്രിയക്ക് വിധേയമായി തീവ്രപരിചരണ വിഭാഗത്തില് കഴിയുകയുമായിരുന്നു. വെന്റിലേറ്ററിന്റെ സഹായത്തോടെയായിരുന്നു ശ്രുതിയുടെ ജിവന് നിലനിര്ത്തിയിരുന്നത്. വെന്റിലേറ്ററില് ജീവന് വേണ്ടി മല്ലിടുമ്പോഴും 33 കാരി ജീവിതത്തിലേക്ക് തിരിച്ചുവരുമെന്നുതന്നെയായിരുന്നു ഉറ്റവരുടെ പ്രതീക്ഷ.
എന്നാല് ഉറ്റവരും ഉടയവരും നടത്തിയ പ്രാര്ത്ഥനകളെല്ലാം വിഫലമായി. ഒരു നാടിനെ ഒന്നടങ്കം കണ്ണീരിലാഴ്ത്തി ശ്രുതി കഴിഞ്ഞ ദിവസം മരണത്തിന് കീഴടങ്ങി.
Discussion about this post