കൊച്ചി: കനത്ത മഴ പെയ്യുന്ന പശ്ചാത്തലത്തില് മലപ്പുറം ജില്ലയിലെ വിദ്യാഭ്യാസ സ്ഥാപനങ്ങള്ക്ക് ഉച്ചയ്ക്കു ശേഷം അവധിയായിരിക്കുമെന്ന് ജില്ലാ കലക്ടര് അറിയിച്ചു. പ്രൊഫഷണല് കോളജ്, കേന്ദ്രീയ വിദ്യാലയങ്ങള് ഉള്പ്പെടെയുള്ള (അംഗന വാടികള്, മദ്രസകള് ഉള്പ്പെടെയുളള മത വിദ്യാഭ്യാസ സ്ഥാപനങ്ങള് അടക്കം) എല്ലാ വിദ്യാഭ്യാസ സ്ഥാപനങ്ങള്ക്കും ഉച്ചയ്ക്ക് ശേഷം അവധി ആയിരിക്കുമെന്ന് കലക്ടര് അറിയിച്ചു.
കുട്ടികള് വീടുകളില് തിരിച്ചെത്തി എന്ന് പ്രധാന അധ്യാപകര് ഉറപ്പുവരുത്തേണ്ടതാണെന്നും, മാതാപിതാക്കള് ജോലി സ്ഥലങ്ങളില് ഉള്ള വിദ്യാര്ത്ഥികളുടെ കാര്യത്തില് സ്കൂള് അധികൃതര് പ്രത്യേകം ശ്രദ്ധിക്കണമെന്നും കലക്ടര് അറിയിപ്പില് പറയുന്നു. കനത്ത മഴ പെയ്യാന് സാധ്യതയുള്ളതിനാല് ജില്ലയില് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്.
കനത്ത മഴ പെയ്യാന് സാധ്യത നിലനില്ക്കുന്നതിനാല് നേരത്ത പത്തനംതിട്ട, തിരുവനന്തപുരം, എറണാകുളം, ആലപ്പുഴ, തൃശ്ശൂര് ജില്ലകളിലെ വിദ്യാഭ്യാസ സ്ഥാപനങ്ങള്ക്ക് ജില്ലാ കലക്ടര്മാര് അവധി പ്രഖ്യാപിച്ചിരുന്നു.
തൃശൂര് ജില്ലയില് പ്രഫഷണല് കോളജ് ഒഴികെയുള്ള വിദ്യാഭ്യാസ സ്ഥാപനങ്ങള്ക്ക് ഇന്ന് ഉച്ചമുതല് അവധി പ്രഖ്യാപിച്ചിട്ടുണ്ട്. കൊട്ടാരക്കര താലൂക്കിലെയും പുനലൂര് മുനിസിപ്പല് പ്രദേശങ്ങളിലെയും പ്രഫഷണല് കോളജുകള് ഉള്പ്പടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും കൊല്ലം ജില്ലാ കലക്ടര് അവധി പ്രഖ്യാപിച്ചു.
Discussion about this post