ജലന്ധര്: വീടിനുള്ളിലെ ഫ്രിഡ്ജ് പൊട്ടിത്തെറിച്ച് മൂന്ന് കുട്ടികള് ഉള്പ്പെടെ ഒരു കുടുംബത്തിലെ അഞ്ച് പേര്ക്ക് ദാരുണാന്ത്യം. റഫ്രിജറേറ്ററിന്റെ കംപ്രസര് പൊട്ടിത്തെറിച്ചാണ് അപകടമുണ്ടായതെന്നാണ് റിപ്പോര്ട്ട്.
പഞ്ചാബിലെ ജലന്ധര് ജില്ലയിലാണ് സംഭവം. ഞായറാഴ്ച രാത്രി നഗരത്തിലെ അവതാര് നഗര് ഏരിയയിലാണ് സംഭവം. രാത്രി വൈകി കംപ്രസറില് വന് സ്ഫോടനം ഉണ്ടാകുകയും തുടര്ന്ന് വീടിന് തീപിടിക്കുകയും ചെയ്തുവെന്നാണ് റിപ്പോര്ട്ട്. അഞ്ച് പേരെയും ജലന്ധര് സിവില് ആശുപത്രിയില് എത്തിച്ചെങ്കിലും ജീവന് രക്ഷിക്കാന് കഴിഞ്ഞില്ല. 7 മാസം മുമ്പ് വാങ്ങിയ പുതിയ ഡബിള് ഡോര് റഫ്രിജറേറ്ററാണ് പൊട്ടിത്തെറിച്ചത്.
യശ്പാല് (70), രുചി (40), മന്ഷ (14), ദിയ (12), അക്ഷയ് (10) എന്നിവരാണ് മരിച്ചത്. റഫ്രിജറേറ്ററിന്റെ കംപ്രസര് പൊട്ടിത്തെറിച്ചതിനെ തുടര്ന്ന് വാതകം വീടിനകത്തും തെരുവിലും വ്യാപിച്ചു. മണിക്കൂറുകള് നീണ്ട പരിശ്രമത്തിനൊടുവിലാണ് അഗ്നിശമന സേനാംഗങ്ങള്ക്ക് തീ നിയന്ത്രണ വിധേയമാക്കിയത്. സ്ഫോടനത്തിന്റെ കാരണം കണ്ടെത്തുന്നതിന് സാമ്പിളുകള് ശേഖരിക്കാന് ഫോറന്സിക് വിദഗ്ധരുടെ സംഘത്തെ വിളിച്ചിട്ടുണ്ടെന്ന് പോലീസ് അറിയിച്ചു.
Discussion about this post