ന്യൂഡല്ഹി: സ്വാതന്ത്ര്യ സമരവുമായി ബന്ധപ്പെട്ട വിവാദ പരാമര്ശങ്ങളില് ബോളീവുഡ് താരം കങ്കണ റണാവത്തിനെതിരെ കടുത്ത വിമര്ശനവുമായി ശശി തരൂര് എംപി. എന്.ഡി.ടി.വിക്ക് നല്കിയ അഭിമുഖത്തിലായിരുന്നു കങ്കണയ്ക്കെതിരെ വിമര്ശനവുമായി രംഗത്തെത്തിയത്.
സ്വാതന്ത്ര്യം ലഭിച്ചതിന്റെ 75-ാം വാര്ഷികത്തില് സംഘടിപ്പിച്ച പരിപാടിയില് സംസാരിക്കവെ ആയിരുന്നു കങ്കണയുടെ വിവാദ പ്രസ്താവന. ‘1947 ല് ഇന്ത്യയ്ക്ക് ലഭിച്ചത് സ്വതന്ത്ര്യമായിരുന്നില്ല. ഭിക്ഷയായിരുന്നു. രാജ്യം യഥാര്ഥത്തില് സ്വതന്ത്രമായത് 2014 ലാണെന്നായിരുന്നു കങ്കണയുടെ പ്രസ്താവന.
തരൂരിന്റെ പരാമര്ശം;
‘കങ്കണ കുറച്ച് ചരിത്രം വായിക്കേണ്ടതുണ്ട്. നിങ്ങളുടെ നിയമം അനീതി നിറഞ്ഞതായതിനാല് അത് ഞാന് ലംഘിക്കുകയാണെന്ന് ബ്രിട്ടീഷുകാരോട് പറഞ്ഞ മഹാത്മാഗാന്ധി സ്വാതന്ത്ര്യത്തിനായി അവരോട് യാചിച്ചു എന്നാണ് കങ്കണ വിശ്വസിക്കുന്നതെങ്കില്… അവര്ക്ക് ഇക്കാര്യങ്ങളെ കുറിച്ചൊന്നും ഒരു ധാരണയും ഇല്ലെന്നാണ് തോന്നുന്നത്.’
‘എന്നെ ശിക്ഷിക്കണമെങ്കില് ശിക്ഷിച്ചോളു, ഞാനാ ശിക്ഷ സ്വീകരിക്കാം’ എന്നത് ഒരു യാചകന്റെ ഭാഷയാണോ. സ്വാതന്ത്ര്യ സമരമെന്നത് അപാരമായ മനക്കരുത്തിന്റെയും ധാര്മ്മികമായ ആര്ജ്ജവത്തിന്റെയും ധൈര്യത്തിന്റെയും മുന്നേറ്റമായിരുന്നു. നൂറുകണക്കിന് ലാത്തികള്ക്കിടയിലേക്ക് നിരായുധനായി നടന്നുപോകുന്ന് ചിന്തിച്ച് നോക്കു. ഒരു ലാത്തിചാര്ജിനെ തുടര്ന്നാണ് ലാലാ ലജ്പത് റായ് കൊല്ലപ്പെടുന്നത്. ഒരു അഹിംസ സമരത്തിനിടയില് അദ്ദേഹത്തിന്റെ തലയടിച്ച് തകര്ക്കുകയായിരുന്നു. തോക്കുമായി ഒരാളെ കൊല്ലാന് പോയി കൊല്ലപ്പെടുന്നതിലും ധീരമാണ്.
Discussion about this post