മുംബൈ: രാത്രി ഭക്ഷണം കഴിച്ച് വിശ്രമിക്കുകയായിരുന്ന വീട്ടുകാരെ ഞെട്ടിച്ച് അപ്രതീക്ഷിതമായി ഒരു അതിഥി എത്തി. ആ അതിഥിയെ കണ്ട ഞെട്ടലിലാണ് മഹാരാഷ്ട്രയിലെ ഒരു കുടുംബം. കുടുംബാംഗങ്ങളെയെല്ലാം അമ്പരപ്പിലാക്കിയ അതിഥി ഒരു പുള്ളിപ്പുലിയായിരുന്നു. മഹാരാഷ്ട്രയിലെ പിമ്പലഗാവ് റോത്തയിലാണ് സംഭവം നടന്നത്.
വീട്ടിലെ വളര്‍ത്തു നായയെ പിന്തുടര്‍ന്നാണ് പുലി വീട്ടിനുള്ളില്‍ കയറിയത്. പുലിയെ കണ്ട വീട്ടുകാര്‍ പുലിയെ മുറിക്കുള്ളിലാക്കി വാതിലടച്ചു. ഉടന്‍ വനംവകുപ്പ് അധികൃതരേയും വന്യ മൃഗ സംരക്ഷണ പ്രവര്‍ത്തന സംഘടനയായ എസ്ഒഎസ് അധികൃതരേയും വിവരം അറിയിച്ചു.
സംഭവ സ്ഥലത്തെത്തിയ രക്ഷാപ്രവര്‍ത്തകര്‍ മയക്കു വെടി വെച്ചാണ് പുലിയെ പിടികൂടിയത്. മൂന്ന് മണിക്കൂറോളം നീണ്ട പ്രയത്നത്തിനൊടുവിലാണ് അധികൃതര്‍ പുലിയെ വലയിലാക്കിയത്. പുള്ളിപ്പുലിയെ കാണാനായി നിരവധി പേരാണ് വീടിനു ചുറ്റും തിങ്ങി നിറഞ്ഞിരുന്നത്.
Discussion about this post