16 വർഷത്തെ കാത്തിരിപ്പും കഷ്ടപ്പാടുകളും വെള്ളിത്തിരയിൽ വിജയകരമായി എത്തിച്ചപ്പോൾ കടപുഴകുന്നത് ഇതുവരെയുണ്ടായിരുന്ന മലയാള സിനിമാ ലോകത്തെ റെക്കോർഡുകൾ. ബ്ലെസി-പൃഥ്വിരാജ് ടീമിന്റെ ആടുജീവിതം 100 കോടി ക്ലബിലെത്തി. റിലീസ് ചെയ്ത് 9 ദിവസം കൊണ്ടാണ് ആടുജീവിതം 100 കോടി ക്ലബിലെത്തിയത്.
ആഗോള തലത്തിലെ കളക്ഷനിലാണ് 100 കോടി നേടിയിരിക്കുന്നത്. മലയാളത്തിൽ അതിവേഗത്തിൽ 100 കോടി കളക്ഷൻ നേടുന്ന സിനിമയെന്ന റെക്കോർഡ് ഇതോടെ ആടുജീവിതത്തിന് സ്വന്തമായി.
പൃഥ്വിരാജ് തന്നെയാണ് സമൂഹമാധ്യമങ്ങളിലൂടെ ആടുജീവിതം നൂറ് കോടി സ്വന്തമാക്കിയ വിവരം സ്ഥിരീകരിച്ചത്. ഫേസ്ബുക്കിലൂടെയാണ് പൃഥ്വിരാജ് വാർത്ത പങ്കിട്ടത്. നേരത്തെ വേഗത്തിൽ 50 കോടി കളക്ഷൻ സ്വന്തമാക്കിയെന്ന റെക്കോർഡും ആടുജീവിതം കൈപ്പിടിയിൽ ഒതുക്കിയിരുന്നു. പൃഥ്വിരാജിന്റെ കരിയറിലെ നൂറ് കോടി ക്ലബിലെത്തുന്ന ആദ്യ ചിത്രമാണ് ആടുജീവിതം.
ഈ വർഷം നൂറ് കോടി ക്ലബിലെത്തുന്ന മൂന്നാമത്തെ മലയാള സിനിമയാണ് ആടുജീവിതം. ഈ വർഷം റിലീസായ പ്രേമലുവും മഞ്ഞുമ്മൽ ബോയ്‌സും നൂറ് കോടി കളക്ഷൻ നേടിയിരുന്നു.
Discussion about this post