കുറച്ചു ദിവസങ്ങള്ക്ക് മുമ്പാണ് നടി മാലാ പാര്വതി ഒരു സിനിമയില് പ്രവര്ത്തിക്കുന്നതിന്റെ പേരില്, അതിന്റെ അണിയറയില് പ്രവര്ത്തിക്കുന്നവരില് നിന്ന് നേരിടേണ്ടി വന്ന അപമാനങ്ങളെ കുറിച്ച് ഫേസ്ബുക്കില് കുറിപ്പ് ഇട്ടിരുന്നു. ഇത് സോഷ്യല് മീഡിയയില് വലിയ ചര്ച്ചയ്ക്ക് വഴി വെച്ചിരുന്നു. സെറ്റില് നടന്നത് പീഡനം അല്ലെന്നും പിന്നീട് ഇതിനെ കുറിച്ച് വിശദീകരിക്കാമെന്നും ഫേസ്ബുക്കിലൂടെത്തന്നെ അവര് പിന്നാലെ അറിയിച്ചിരുന്നു.
‘ഹാപ്പി സര്ദാര്’ എന്ന സിനിമയുടെ ലൊക്കേഷനില് നേരിട്ട ദുരനുഭവത്തെക്കുറിച്ചാണ് മാലാ പാര്വ്വതി സൂചിപ്പിച്ചിരിക്കുന്നത്. ചിത്രത്തിന്റെ നിര്മ്മാതാവിന്റെ കാഷ്യര് മാലാ പാര്വതിയുടെ പേര് പരാമര്ശിക്കാതെ തങ്ങളുടെ ലൊക്കേഷനില് ഒരു ‘അമ്മ നടി’ കാരവന് ആവശ്യപ്പെട്ടെന്ന് ഫേസ്ബുക്കില് പോസ്റ്റ് ഇട്ടിരുന്നു. ഇതിന് മറുപടിയുമായി രംഗത്ത് എത്തിയിരിക്കുകയാണ് മാലാ പാര്വതി.
ചിത്രത്തിന്റെ സെറ്റില് മൂത്രമൊഴിക്കാന് പോലുമുള്ള സൗകര്യം ഉണ്ടായിരുന്നില്ലെന്നും മൂത്രം ഒഴിക്കാതിരിക്കാനുള്ള അമാനുഷിക കഴിവ് ഇല്ലാതിരുന്നതിനാല് സ്വന്തം കാശ് മുടക്കിയാണ് താന് കാരവന് എടുത്തതെന്നും മാലാ പാര്വതി ഫേസ്ബുക്കില് കുറിച്ചു.
മാലാ പാര്വതിയുടെ ഫേസ്ബുക്ക് പോസ്റ്റിന്റെ പൂര്ണ്ണരൂപം,
Happy sardar.. എന്ന സിനിമയില് അമ്മ നടി കാരവന് ചോദിച്ചു എന്നൊരാരോപണം Sanjay Pal ഉന്നയിച്ചിരുന്നു. പ്രൊഡ്യൂസറുടെ കാഷ്യര് ആണ് ആള്. ചായ, ഭക്ഷണം, ടോയ്ലറ്റ് പോലെയുള്ള അടിസ്ഥാന സൗകര്യം തരാത്തവരോട് കാരവന് ചോദിക്കാന് പാടില്ല എന്ന സാമാന്യ ബോധം ഉണ്ട്. ഉച്ചയ്ക്ക് 3 മുതല് പിറ്റേന്ന് വെളുപ്പിന് 6 വരെ ജോലി ചെയ്യുന്ന സെറ്റില് പ്രാഥമിക ആവശ്യങ്ങള് നിര്വഹിക്കാന് തന്നിരുന്നിടത്ത് ബ്ലോക്ക് ആയിരുന്നതിനാലും, മൂത്രമൊഴിക്കാതിരിക്കാനുള്ള അമാനുഷിക കഴിവ് ഇല്ലാതിരുന്നതിനാലും ഞാന് കാരവന് എടുത്തു. എന്റെ സ്വന്തം കാശിന്. എല്ലാ പെണ്കുട്ടികള്ക്കും വേണ്ടി. അമ്മ നടി ആണെങ്കിലും മൂത്രം ഒഴിക്കണമല്ലോ? അതോ വേണ്ടേ? നായകനും നായികയ്ക്കും മാത്രമേ ഉള്ളോ ഈ ആവശ്യങ്ങള്? Sanjay Pal എന്ന ആള്ക്കുള്ള മറുപടിയാണിത്. ബില്ല് ചുവടെ ചേര്ക്കുന്നു. ഈ സെറ്റിലെ വിശേഷങ്ങള് പറഞ്ഞാല് തീരില്ല. തല്ക്കാലം നിര്ത്തുന്നു.
സുദീപും ഗീതികയും ചേര്ന്ന് സംവിധാനം ചെയ്യുന്ന ചിത്രം നിര്മ്മിക്കുന്നത് ഹസീബ് ഹനീഫ് ആണ്. ഈ സിനിമയുടെ ചിത്രീകരണത്തിന് കഴിഞ്ഞ ദിവസം പാക്കപ്പ് ആയി.
Discussion about this post