നോയ്ഡ: വിവാഹിതനായ യുവാവിനെ പ്രണയിച്ച യുവതിയെ ആസിഡൊഴിച്ച് കൊലപ്പെടുത്താന് സഹോദരന്മാരുടെ ശ്രമം. ഗുരുതരമായി പൊള്ളലേറ്റ സല്മ(22) നോയ്ഡ ജില്ലാ ആശുപത്രിയില് ചികിത്സയിലാണ്. യുവതിയുടെ മൂന്ന് സഹോദരങ്ങളായ ഇര്ഫാന്, റിസ്വാന്, ഇമ്രാന് എന്നിവര്ക്കെതിരെ പോലീസ് കൊലപാതകശ്രമത്തിന് കേസ് ചാര്ജ് ചെയ്തു. മൂന്നുപേരേയും തിങ്കളാഴ്ച പോലീസ് അറസ്റ്റ് ചെയ്തിരുന്നു.
ബുലന്ദ്ഷഹര് സ്വദേശികളാണ് ഇവര്. അതേസമയം ചികിത്സയില് തുടരുന്ന യുവതിയുടെ നില മെച്ചപ്പെട്ടെന്ന് അധികൃതര് അറിയിച്ചു. എങ്കിലും ഒരുമാസത്തോളം നീണ്ട ആശുപത്രി ചികിത്സ യുവതിക്ക് ആവശ്യമാണെന്ന് ഡോക്ടര്മാര് അറിയിച്ചു. എന്നാല്, യുവതിയെ പരിചരിക്കാന് ബന്ധുക്കള് വിസ്സമ്മതിച്ചതോടെ വനിതാ കോണ്സ്റ്റബിളാണ് യുവതിയുടെ പരിചരണത്തിനായി ആശുപത്രിയില് കഴിയുന്നത്.
യുവതിയുടെ താമസ സ്ഥലത്തിന് അടുത്ത പ്രദേശത്തെ ഭൂവുടമയുമായി യുവതി അടുപ്പത്തിലായതാണ് സഹോദരന്മാരെ പ്രകോപിപ്പിച്ചത്. ബന്ധത്തില്നിന്ന് പിന്മാറാന് ആവശ്യപ്പെട്ടെങ്കിലും യുവതി നിരസിച്ചതോടെ കൊലപ്പെടുത്താന് ഇവര് തീരുമാനിക്കുകയായിരുന്നു. മേയ് അഞ്ചിന് ബന്ധുവിന്റെ വീട്ടിലേക്ക് പോയ സല്മയെ തിരിച്ച് വീട്ടിലേക്ക് സ്കൂട്ടറില് കൊണ്ടുവിടാനെന്ന വ്യാജേനെ ഇര്ഫാനും റിസ്വാനും കൂടെക്കൂട്ടുകയും ദാദ്രിയിലെത്തിയപ്പോള് ആളൊഴിഞ്ഞ സ്ഥലത്ത് വച്ച് ഇവര് യുവതിയെ കഴുത്ത് ഞെരിക്കുകയും ആസിഡ് മുഖത്തൊഴിക്കുകയും ചെയ്യുകയായിരുന്നു. യുവതി മരിച്ചെന്ന് കരുതി പാലത്തിന് ചുവട്ടില് ഉപേക്ഷിച്ചു കടന്നു കളഞ്ഞു. കൃത്യത്തിന് ശേഷം മൂന്നുപേരും ഒളിവിലായിരുന്നു. രണ്ട് പേര്ക്ക് കൃത്യത്തില് നേരിട്ട് പങ്കുണ്ടെന്നും ഒരാള്ക്ക് ഗൂഢാലോചനയില് പങ്കുണ്ടെന്നും പോലീസ് അറിയിച്ചു.
Discussion about this post