കൊല്ലം: ഓടുന്ന ട്രെയിനില് നിന്ന് വലിച്ചെറിഞ്ഞ ബിയര് കുപ്പികള് തലയില് വന്ന് അടിച്ചുകൊണ്ട് യുവാവിന് പരിക്ക്. പരവൂര് നെടുങ്ങോലം സ്വദേശി ആര്എസ് ഗോപകുമാറിനാണു (36) പരിക്കേറ്റത്. കഴിഞ്ഞ ദിവസം വൈകുന്നേരത്തോടെ ചെമ്മാന്മുക്ക് മേല്പാലത്തിനു സമീപമായിരുന്നു സംഭവം.
കൂലിപ്പണിക്കാരനായ ഗോപകുമാര് ജോലി കഴിഞ്ഞു വീട്ടിലേക്കു മടങ്ങുകയായിരുന്നു. കൊല്ലം റെയില്വേ സ്റ്റേഷനിലേക്കു ട്രാക്കിനു സമീപത്തു കൂടി പോകുമ്പോള് ഇതുവഴി കടന്നു പോയ തിരുവനന്തപുരം വെരാവല് എക്സ്പ്രസില് നിന്ന് ബിയര് കുപ്പികള് ചീറിപാഞ്ഞ് വരികയായിരുന്നു.
2 കുപ്പികളാണ് എറിഞ്ഞതെന്നും ആദ്യത്തെ കുപ്പി ചെവിയുടെ സമീപത്തു കൂടി പോയതിനു തൊട്ടുപിന്നാലെ എത്തിയ രണ്ടാമത്തെ കുപ്പിയാണു തലയില് കൊണ്ടു പൊട്ടിയതെന്നു ഗോപകുമാര് പറയുന്നു. സമീപത്തുണ്ടായിരുന്ന വഴിയാത്രക്കാരന് ഇദ്ദേഹത്തെ ഉടനെ റെയില്വേ സ്റ്റേഷനിലെ സ്വകാര്യ ആശുപത്രി കൗണ്ടറില് എത്തിക്കുകയായിരുന്നു. പിന്നീട് ജില്ലാ ആശുപത്രിയില് പ്രവേശിപ്പിച്ച ഗോപകുമാറിന്റെ തലയില് രണ്ട് സ്റ്റിച്ചാണ് ഇട്ടത്.
Discussion about this post