തൃശ്ശൂര്: പാര്വതി നായികയായി എത്തിയ ഏറ്റവും പുതിയ ചിത്രമായ ‘ഉയരെ’ പ്രേക്ഷക ഹൃദയം കവര്ന്ന് മുന്നേറിക്കൊണ്ടിരിക്കുകയാണ്. ഈ അവസരത്തിലാണ് പാര്വതിയെ കുറിച്ചുള്ള അനുഭവം പങ്കുവെച്ച് സിസ്റ്റര് ലിനിയുടെ ഭര്ത്താവ് സജീഷ് പുതൂര് രംഗത്ത് എത്തിയിരിക്കുന്നത്. ഫേസ്ബുക്കിലൂടെയാണ് സതീഷ് അനുഭവം പങ്കുവെച്ചത്. ലിനിയുടെ മരണശേഷം താന് സിനിമ കണ്ടിട്ടില്ലെന്നും എന്നാല് പാര്വതിയുടെ പുതിയ ചിത്രമായ ‘ഉയരെ’ താന് കാണുമെന്നുമാണ് സതീഷ് ഫേസ്ബുക്കില് കുറിച്ചത്.
ഇതിന് പുറമെ പാര്വതി തന്നോട് ഒരിക്കല് മക്കളുടെ പഠനച്ചെലവ് ഏറ്റെടുത്തോട്ടേ എന്ന് ചോദിച്ചിരുന്നുവെന്നും എന്നാല് താന് ആ വാഗ്ദാനം സ്നേഹത്തോടെ നിരസിക്കുകയായിരുന്നുവെന്നും സതീഷ് കുറിച്ചു.
ലിനി മരിച്ച് മൂന്നാം ദിവസമാണ് പാര്വതി തന്നെ വിളിച്ച് ഈ കാര്യം പറഞ്ഞതെന്നും അദ്ദേഹം കുറിച്ചു.
സജീഷ് പുതൂരിന്റെ ഫേസ്ബുക്ക് പോസ്റ്റിന്റെ പൂര്ണ്ണരൂപം,
‘ഉയരെ ഉയരെ പാര്വ്വതി.. പാര്വ്വതിയുടെ ഒട്ടുമിക്ക സിനിമകളും കാണാറുളള അവരുടെ അത്ഭുതപ്പെടുത്തുന്ന അഭിനയത്തിന്റെ ഒരു ആരാധകന് കൂടിയാണ് ഞാന്. ലിനിയുടെ മരണശേഷം ഇതുവരെ സിനിമ കണ്ടിട്ടില്ല അതുകൊണ്ട് തന്നെ ‘ഉയരെ’ കാണാന് ശ്രമിച്ചിട്ടില്ല. പക്ഷെ ഞാന് കാണും, കാരണം ആ സിനിമയെ കുറിച്ച് വളരെ നല്ല അഭിപ്രായം ഉളളത് കൊണ്ട് മാത്രമല്ല, പാര്വ്വതി എന്ന നടിയുടെ അതിജീവനത്തിന്റെ വിജയം കൂടി ആയിരുന്നു ആ സിനിമ. സിനിമ മേഖലയിലെ പുരുഷാധിപത്യത്തിനെതിരെ, അതിക്രമങ്ങള്ക്കെതിരെ ശബ്ദിച്ചതിന് ഫെമിനിച്ചി എന്നും, ജാഡയെന്നും പറഞ്ഞ് ഒറ്റപ്പെടുത്തി സിനിമയില് നിന്നും തുടച്ച് നീക്കാന് നടത്തിയ ശ്രമങ്ങള് ധീരതയോടെ നേരിട്ട നടി എന്നത് കൊണ്ടും
അതിനപ്പുറം പാര്വ്വതി എന്ന വ്യക്തിയെ എനിക്ക് നേരിട്ട് അറിയുന്നത്.. ലിനി മരിച്ച് മൂന്നാം ദിവസം എന്നെ വിളിച്ച് ‘സജീഷ്, ലിനിയുടെ മരണം നിങ്ങളെ പോലെ എന്നെയും ഒരുപാട് സങ്കടപ്പെടുത്തുന്നു. പക്ഷെ ഒരിക്കലും തളരരുത് ഞങ്ങള് ഒക്കെ നിങ്ങളെ കൂടെ ഉണ്ട്. സജീഷിന് വിരോധമില്ലെങ്കില് രണ്ട് മക്കളുടെയും പഠന ചിലവ് ഞാന് എടുത്തോട്ടെ, ആലോചിച്ച് പറഞ്ഞാല് മതി’ എന്ന വാക്കുകള് ആണ്.
പക്ഷെ അന്ന് ഞാന് വളരെ സ്നേഹത്തോടെ അത് നിരസിച്ചു. പിന്നീട് പാര്വ്വതി തന്നെ മുന് കൈ എടുത്ത് അവറ്റിസ് മെഡിക്കല് ഗ്രുപ്പ് ഡോക്ടര് മാര് ഇതേ ആവശ്യവുമായി വന്നു. ‘ലിനിയുടെ മക്കള്ക്ക് ലിനി ചെയ്ത സേവനത്തിന് ലഭിക്കുന്ന അംഗീകാരവും അവകാശപ്പെട്ടതുമാണ് ഈ ഒരു പഠന സഹായം’ എന്ന പാര്വ്വതിയുടെ വാക്ക് എന്നെ അത് സ്വീകരിക്കാന് സന്നദ്ധനാക്കി.
ലിനിയുടെ ഒന്നാം ചരമദിനത്തിന് കെ.ജി.എന്.എ സംഘടിപ്പിച്ച അനുസ്മരണത്തില് വച്ച് പാര്വ്വതിയെ നേരിട്ട് കാണാനും റിതുലിനും സിദ്ധാര്ത്ഥിനും അവരുടെ സ്നേഹമുത്തങ്ങളും ലാളനവും ഏറ്റ് വാങ്ങാനും കഴിഞ്ഞു. ഒരുപാട് സ്നേഹത്തോടെ പാര്വ്വതി തിരുവോത്തിന് ആശംസകള്..’
Discussion about this post