ജീവിതത്തില്‍ ഏറെ വിഷമമേറിയ ഘട്ടത്തിലൂടെ കടന്നുപോകുമ്പോഴും സമൂഹ മാധ്യമങ്ങളില്‍ നിന്നു ദുരനുഭവം നേരിടുന്നെന്ന് നടന്‍ ബാലയുടെ ഭാര്യ എലിസബത്ത്. വിഷമം സഹിക്കാന്‍ പറ്റാത്തതുകൊണ്ടാണ് ഇങ്ങനെയൊരു കുറിപ്പ് എഴുതുന്നതെന്നും ഒരു സ്ത്രീയുടെ ഭര്‍ത്താവിന് എന്തെങ്കിലും പറ്റിയാല്‍ ഇങ്ങനെയാണോ ആളുകള്‍ പെരുമാറുകയെന്നുമാണ് എലിസബത്ത് ചോദിക്കുന്നത്. മോശം മെസ്സേജ് അയച്ചയാളുകളുടെ സ്‌ക്രീന്‍ ഷോട്ട് ഉള്‍പ്പടെ പങ്കുവച്ചായിരുന്നു എലിസബത്തിന്റെ പ്രതികരണം.
”ഈ സമയത്ത് ഇങ്ങനെ ഒരു പോസ്റ്റ് ഇടുന്നത് വിഷമം സഹിക്കാന്‍ പറ്റാഞ്ഞിട്ടാണ്. ഒരു സ്ത്രീയുടെ ഭര്‍ത്താവിന് എന്തെങ്കിലും പറ്റിയാല്‍ ഇങ്ങനെയാണോ ആളുകള്‍ പെരുമാറുക. ഈ സ്‌ക്രീന്‍ഷോട്ട് ഇടാന്‍ കാരണം ഞാന്‍ പറയാം. ഇയാളുടെ ട്രോള്‍ ഗ്രൂപ്പില്‍ പണ്ടൊരു അഞ്ച് ദിവസം ഞാന്‍ ഗ്രൂപ്പ് അഡ്മിന്‍ ആയി ഉണ്ടായിരുന്നു. എനിക്ക് ട്രോള്‍ ഗ്രൂപ്പ് എന്നു പറഞ്ഞാല്‍ ട്രോള്‍ റിപ്പബ്ലിക് ഇടാന്‍ ആണ് ഇഷ്ടം.
പക്ഷേ ”ഒന്ന് അഡ്മിന്‍ ആയി നില്‍ക്കൂ, ഇഷ്ടപ്പെട്ടില്ലെങ്കില്‍ വേണ്ട” എന്നൊക്കെ പറഞ്ഞു ആ ഗ്രൂപ്പില്‍ കയറിയതാണ്. അവരുടെ അഡ്മിന്‍സ് ഗ്രൂപ്പില്‍ ഞാന്‍ ഉണ്ടായിരുന്നു. അതില്‍ ഉള്ള ഒരു ഫേക്ക് ഐഡി എനിക്ക് മോശമായി മെസ്സേജ് ചെയ്തിരുന്നു. ഞാന്‍ അതിന്റെ സ്‌ക്രീന്‍ഷോട്ട് എടുത്ത് ഈ പറയുന്ന ആള്‍ക്ക് അയച്ചു. ആരാണ് ഈ ഫേക്ക് ഐഡി എന്നു ചോദിച്ചിരുന്നു. അപ്പോള്‍ പുള്ളിക്ക് അറിയില്ല എന്നും അതില്‍ എന്താണ് ഇത്ര തെറ്റ് എന്നും തിരിച്ചു ചോദിച്ചു. ഞാന്‍ അപ്പോള്‍ തന്നെ ആ ഗ്രൂപ്പില്‍ നിന്നും ഇവരുടെ അഡ്മിന്‍ ഗ്രൂപ്പില്‍ നിന്നും പിന്‍വാങ്ങി. വീണ്ടും ഇതുപോലെ ഇടയ്ക്കു കോള്‍ ചെയ്യാനും അത് പോലെ ഇന്‍സ്റ്റയില്‍ മെസ്സേജ് ചെയ്യാനും ശ്രമിക്കുന്നു.
മറുപടി ഇല്ല എന്നു കണ്ടപ്പോള്‍ എന്റെ ജാഡ കാരണമാണ് ഞാന്‍ ഇപ്പോള്‍ കടന്നു പോകുന്ന അവസ്ഥ അനുഭവിക്കുന്നതെന്ന് പറഞ്ഞു. എന്റെ ഭര്‍ത്താവിന് ഒന്നും സംഭവിക്കില്ല എന്ന് എനിക്ക് ഉറപ്പാണ്, എന്തെകിലും ഉണ്ടാകാന്‍ ആഗ്രഹിക്കുന്ന കുറെ ആളുകള്‍ ഉണ്ട് എന്ന് അറിയാം. നിങ്ങളെയൊന്നും ബ്ലോക്ക് ചെയ്തിട്ട് ഒരു കാര്യമില്ല എന്ന് അറിയാം. ഇപ്പോള്‍ തന്നെ 100 ഫേക്ക് ഐഡി ഉണ്ടല്ലോ.
അതുപോലെ ഒരാള്‍ വയ്യാതെ ഇരിക്കുന്ന ഒരു സമയത്ത് അയാളുടെ ഭാര്യയോട് ‘ഐ ലവ് യു’ പറയുന്നത് എന്ത് കണ്ടിട്ടാണെന്ന് മനസിലാവുന്നില്ല. ‘എന്താ ബുക്ക് ചെയ്യണോ’, ഈ 4 ദിവസത്തില്‍ 2 പേരാണ് ഇതു പോലെ പറഞ്ഞത്. ഒരാള്‍ ഒരാളോട് ഇഷ്ടമാണ് എന്ന് പറയുന്നതില്‍ തെറ്റില്ല. പക്ഷേ ഇങ്ങനെയുള്ള അവസ്ഥയില്‍ ഇരിക്കുമ്പോള്‍ എങ്ങനെ പറയാന്‍ തോന്നുന്നു. ഏതെങ്കിലും പെണ്ണ് ഒറ്റയ്ക്ക് ആയാല്‍ പിന്നെ ഈസിയാണ് അല്ലെ കാര്യങ്ങള്‍. ദയവു ചെയ്ത്, ഈ പെണ്ണ് എന്ന് പറഞ്ഞാല്‍ ഉപയോഗിക്കാന്‍ ഉള്ള വസ്തു മാത്രമായി കാണുന്നത് മാറ്റിവയ്ക്കൂ. അവര്‍ക്കും ഈ മനസ്സും വിഷമവും ഒക്കെ ഉണ്ട് എന്ന് കാണുന്നത് നല്ലതായിരിക്കും. പിന്നെ ബാല ചേട്ടന് ഓക്കേ ആണ്. എല്ലാരുടെയും പ്രാര്‍ഥനകള്‍ക്കു നന്ദി.”എലിസബത്ത് പറഞ്ഞു.
Discussion about this post