കൊച്ചി: കടയ്ക്കാവൂരില് പ്രായപൂര്ത്തിയാകാത്ത മകനെ ലൈംഗികമായി പീഡിപ്പിച്ചു എന്ന കേസില് മാതാവിനു ഹൈക്കോടതി ജാമ്യം അനുവദിച്ചു. വനിതാ ഐപിഎസ് ഓഫിസര് കേസ് അന്വേഷിക്കണമെന്നും അന്വേഷണ പുരോഗതി റിപ്പോര്ട്ട് അറിയിക്കണമെന്നും കോടതി നിര്ദേശിച്ചു. അമ്മക്ക് എതിരെ ലൈംഗിക പീഢനം ആരോപിച്ച കുട്ടിയെ പിതാവിന്റെ അടുത്തുനിന്നു മാറ്റിത്താമസിപ്പിക്കാമെന്നും കോടതി പറഞ്ഞു.
കോടതി കേസ് പരിഗണിച്ചപ്പോള് ആരോപണ വിധേയയായ മുപ്പത്തിയഞ്ചുകാരിയായ അമ്മയുടെ ജാമ്യാപേക്ഷയെ സര്ക്കാര് എതിര്ത്തിരുന്നു. എന്നാല് സര്ക്കാര് വാദം തള്ളി യുവതിക്ക് കോടതി ജാമ്യം അനുവദിച്ചത്. കുട്ടിയുടെ മൊഴിയില് കഴമ്പുണ്ടെന്നും, അമ്മയുടെ മൊബൈല് ഫോണില് നിന്നും നിര്ണായക തെളിവ് ലഭിച്ചു എന്നും ഇത് കുടുംബ പ്രശ്നം മാത്രമല്ല അതിനപ്പുറം മാനങ്ങളുള്ള കേസാണെന്നും പ്രോസിക്യൂഷന് കോടതിയെ അറിയിച്ചിരുന്നു.
പരാതി നല്കിയ കുട്ടിക്ക് അമ്മ ചില മരുന്നുകള് നല്കിയിരുന്നു. ഇവരുടെ വീട്ടില് നടത്തിയ പരിശോധനയില് ഈ മരുന്നുകള് കണ്ടെത്തിയെന്നും പ്രോസിക്യൂഷന് വ്യക്തമാക്കി. കേസന്വേഷണം പുരോഗമിക്കുന്നതിനാല് അമ്മയ്ക്ക് ജാമ്യം നല്കരുതെന്നും പ്രോസിക്യൂഷന് ആവശ്യപ്പെട്ടു.
അതേസമയം, മാതൃത്വത്തെ അവഹേളിക്കുന്ന കേസാണിതെന്ന് കുട്ടിയുടെ അമ്മയുടെ അഭിഭാഷന് പറഞ്ഞു. ജീവനാംശം ലഭിക്കുന്നതുമായി ബന്ധപ്പെട്ട് ആറ്റിങ്ങല് കോടതിയില് കുട്ടിയുടെ പിതാവിനെതിരെ
പരാതി നല്കിയതിന് പിന്നാലെയാണ് തന്റെ മൂന്നുമക്കളെ പിടിച്ചുകൊണ്ടുപോയതെന്നും യുവതി അറിയിച്ചു. ഭര്ത്താവിന്റെ ഒപ്പമുള്ള സ്ത്രീ ബ്രെയിന്വാഷ് ചെയ്താണ് കുട്ടികളെ യുവതിക്കെതിരെ തിരിച്ചതെന്നും യുവതിയുടെ അഭിഭാഷന് ആരോപിച്ചു.
Discussion about this post