ശരീരത്തില് പലവിധ മാറ്റങ്ങള് വരുത്തി മോഡിഫിക്കേഷന് ചെയ്യുന്ന ഒരുപാടാളുകളുണ്ട്. പിയേഴ്സിങ്ങും ടാറ്റൂയിങ്ങുമൊക്കെ ഇത്തരത്തില് ശരീരം മോഡിഫൈ ചെയ്യാനുള്ള വഴികളാണ്. ഇവയൊക്കെയാണ് പൊതുവേ കാണാറുള്ളതെങ്കിലും എക്സ്ട്രീം എന്ന് നമുക്ക് തോന്നുന്ന തരത്തില് ശരീരം മോഡിഫൈ ചെയ്യുന്നവരുണ്ട്. കണ്ണിന്റെ നിറം ഇഷ്ടത്തിനനുസരിച്ച് മാറ്റുന്നവരും എല്ലുകളെടുത്ത് കളഞ്ഞ് ശരീരം ഷെയ്പ്പ് ആക്കുന്നവരുമായ ഒരുപാട് പേര്.
ഇത്തരത്തില് ശരീരം മോഡിഫൈ ചെയ്യുന്നത് ഹരമായി മാറിയ ഒരാളാണ് കലിഫോര്ണിയ സ്വദേശിയായ ബ്രിയന്ന മേരി ഷിഹാദ് എന്ന ആര്ട്ടിസ്റ്റ്. ശസ്ത്രക്രിയയിലൂടെ നാവ് രണ്ടായി പിളര്ത്തിയിരിക്കുകയാണ് ബ്രിയന്ന. കഴിഞ്ഞ ദിവസം ഇന്സ്റ്റഗ്രാമില് ‘എങ്ങനെ ഒരേസമയം നിങ്ങള്ക്ക് രണ്ട് രുചികള് ആസ്വദിക്കാം’ എന്ന ചോദ്യവുമായി ബ്രിയന്ന ഒരു വീഡിയോ പോസ്റ്റ് ചെയ്തു. രണ്ടായി പിളര്ത്തിയ തന്റെ നാവിലൂടെ രണ്ട് വ്യത്യസ്ത പാനീയങ്ങള് രുചിച്ചാണ് ബ്രിയന്ന തന്റെ ചോദ്യത്തിന് ഉത്തരം പങ്ക് വച്ചത്.
രണ്ട് ഗ്ലാസ്സുകളിലായി വച്ചിരിക്കുന്ന വ്യത്യസ്ത പാനീയങ്ങള് ബ്രിയന്ന രുചിക്കുന്നതാണ് വീഡിയോ. ഇരുഗ്ലാസ്സുകളിലേക്കും ഒരേ സമയം നാക്കുകള് നീട്ടിയാണ് ബ്രിയന്ന പാനീയങ്ങള് രുചിക്കുന്നത്. ഒരു ഗ്ലാസ്സില് വെള്ളവും മറ്റേ ഗ്ലാസ്സില് സ്പ്രൈറ്റുമാണുള്ളത്. കുനിഞ്ഞ് നാക്ക് നീട്ടുമ്പോള് നാക്കിന്റെ രണ്ടറ്റവും രണ്ട് ഗ്ലാസുകളിലേക്കും മുങ്ങുന്നതായി വീഡിയോയില് കാണാം. എന്റെ മസ്തിഷ്കത്തില് വ്യത്യസ്തമായ അനുഭവമാണ് ഇതിലൂടെയുണ്ടാകുന്നത് എന്നാണ് ബ്രിയന്ന വീഡിയോയിലൂടെ പറയുന്നത്. ഒരിക്കലും ഒരുപോലെയല്ല രുചി അറിയാന് കഴിയുക എന്ന് ബ്രിയന്ന ഉറപ്പിച്ച് പറയുന്നു. ഇതുവരെ ഇരുപതുലക്ഷത്തിലധികം പേര് വീഡിയോ കണ്ടിട്ടുണ്ട്. പിളര്ത്തിയ നാക്കിലൂടെ രുചി അറിയുന്നത് എങ്ങനെയുണ്ടാകും എന്നറിയാന് ആഗ്രഹമുണ്ടെന്നാണ് മിക്ക കമന്റുകളും.
ഇത്തരം പരീക്ഷണങ്ങളൊക്കെ കണ്ട് നാക്ക് പിളര്ത്തണമെന്ന് ആര്ക്കെങ്കിലും തോന്നിയാല് ഒന്നുകൂടി ആലോചിക്കുന്നതാവും നല്ലതെന്നാണ് ആരോഗ്യവിദഗ്ധര് പറയുന്നത്. നാക്ക് പിളര്ത്തുന്ന ശസ്ത്രക്രിയ ഒരുപാട് റിസ്ക് എടുത്ത് ചെയ്യുന്ന ഒരു ഓപ്പറേഷന് ആണെന്നും ചിലപ്പോള് അമിത രക്തശ്രാവം, ഞരമ്പ് തളര്ച്ച, ഗുരുതരമായ അണുബാധ എന്നിവയൊക്കെ ഇതിലൂടെ ഉണ്ടായേക്കാം എന്നും ഇവര് മുന്നറിയിപ്പ് നല്കുന്നു.
Discussion about this post