കുട്ടികള്‍ക്കെന്തെങ്കിലും സംഭവിച്ചാല്‍ അമ്മമാര്‍ക്കാണ് ആരെക്കാളും ടെന്‍ഷന്‍. പനിയോ ജലദോഷമോ എന്ത് തന്നെയായാലും അത് മാറിക്കഴിഞ്ഞേ അമ്മമാര്‍ക്ക് സമാധാനമുള്ളൂ. ഇത് മനുഷ്യരുടെ കാര്യത്തില്‍ മാത്രമല്ല, മൃഗങ്ങള്‍ക്കിടയിലും അങ്ങനെ തന്നെയാണ്.
കുട്ടിയാന കുഴിയില്‍ വീണത് കണ്ട് ബോധം കെട്ട് വീണ ഒരു അമ്മയാനയുടെ വീഡിയോ ആണ് ഇപ്പോള്‍ സോഷ്യല്‍മീഡിയയില്‍ നിറയുന്നത്. തായ്‌ലന്‍ഡിലാണ് സംഭവം. ഒരു വയസ്സുള്ള കുട്ടിയാനയാണ് ചെളി നിറഞ്ഞ കുഴിയില്‍ വീണത്. കുട്ടിയാനയെ രക്ഷിക്കാന്‍ കഴിയാഞ്ഞതോടെ അമ്മയാനയ്ക്ക് വെപ്രാളമായി. ഇതിനിടെ രക്ഷാപ്രവര്‍ത്തകരെത്തി കുഞ്ഞിനെ രക്ഷിക്കാന്‍ നോക്കിയെങ്കിലും കഴിഞ്ഞില്ല. ഇതോടെ അമ്മയാന കുഴഞ്ഞ് വീഴുകയായിരുന്നു.
ഏറെ നേരത്തെ പരിശ്രമത്തിനൊടുവില്‍ കുഞ്ഞിനെ രക്ഷാപ്രവര്‍ത്തകര്‍ കരയ്ക്ക് കയറ്റി. അമ്മയാനയെ ഉണര്‍ത്താനുള്ള ശ്രമമായി പിന്നീട്. കുഴിയില്‍ നിന്ന് രക്ഷപെട്ട കുഞ്ഞും അമ്മയെ തട്ടി എഴുന്നേല്‍പ്പിക്കാന്‍ നോക്കുന്നുണ്ടായിരുന്നു. ഒടുവില്‍ രക്ഷാപ്രവര്‍ത്തകര്‍ സിപിആര്‍ നല്‍കിയാണ് ആനയെ എഴുന്നേല്‍പ്പിച്ചത്. ഇതിന് ശേഷം ഇരുവരെയും കാട്ടിലേക്ക് തിരിച്ചയച്ചു.
