ലണ്ടന്: ബ്രിട്ടണിലെ റെഡ്ഡിങ്ങില് കാന്സര് ബാധിച്ച് മലയാളി യുവതി മരിച്ചു. ഇടുക്കി കട്ടപ്പന സ്വദേശിനി റെയ്ച്ചല് സുനില് ആണ് മരിച്ചത്. 33 വയസായിരുന്നു. ഒരാഴ്ചയ്ക്കുള്ളില് ബ്രിട്ടനില് കാന്സര് മൂലം മരിക്കുന്ന മൂന്നാമത്തെ മലയാളിയാണ് റെയ്ച്ചല്. ഇവരുടെ അകാല വിയോഗത്തില് ബ്രിട്ടനിലെ മലയാളി സമൂഹവും തകര്ന്നിരിക്കുകയാണ്.
രണ്ടാഴ്ച മുമ്പാണ് റെയ്ച്ചലിനെ കടുത്ത വയറുവേദനയെത്തുടര്ന്ന് കേംബ്രിഡ്ജിലെ ആശുപത്രിയില് പ്രവേശിപ്പിച്ചത്. തുടര്ന്നു നടത്തിയ പരിശോധനയിലാണ് കാന്സര് സ്ഥിരീകരിച്ചത്. ഏതാനും ദിവസം മുമ്പ് ആശുപത്രിയില്നിന്നും വീട്ടിലെത്തി വിശ്രമത്തില് കഴിയവേയാണ് ചൊവ്വാഴ്ച രാത്രി മരണം സംഭവിച്ചത്. തിരുവനന്തപുരം സ്വദേശിയായ സുനിലാണ് റെയ്ച്ചിലിന്റെ ഭര്ത്താവ്.
ഇടുക്കി കട്ടപ്പന സ്വദേശി തുണ്ടത്തിലേട്ട് ടിഎസ് ബേബിയുടെയും മണി ടീച്ചറുടെയും മകളാണ്. റെയ്ച്ചലിനെയും ഭര്ത്താവിനെയും സന്ദര്ശിക്കാന് കഴിഞ്ഞവര്ഷം ഇതേസമയം മാതാപിതാക്കള് ബ്രിട്ടനില് എത്തിയിരുന്നു. റെയ്ച്ചലിന്റെ സഹോദരിമാര് ഇരുവരും അമേരിക്കയിലാണ്. അതേസമയം, കൊവിഡ് നിയന്ത്രണങ്ങള് നിലനില്ക്കുന്നതിനാല് മൃതദേഹം നാട്ടിലെത്തിക്കുന്ന കാര്യത്തില് തീരുമാനം ആയിട്ടില്ല.
Discussion about this post