കോട്ടയം: പാമ്പാടിയില് നിയന്ത്രണം വിട്ട കാര് സ്കൂള് മതിലില് ഇടിച്ചുകയറിയുണ്ടായ അപകടത്തില് മൂന്ന് വയസ്സുകാരന് ദാരുണാന്ത്യം. ഡല്ഹിയില് സ്ഥിരതാമസമാക്കിയ മല്ലപ്പള്ളി സ്വദേശികളായ ടിനു- മെറിന് ദമ്പതികളുടെ മകന് കീത്ത് തോമസാണ് മരിച്ചത്. മെറിന്റെ സഹോദരിയുടെ കുഞ്ഞിന്റെ മാമോദീസാ ചടങ്ങില് പങ്കെടുത്ത് മടങ്ങവെയാണ് അപകടമുണ്ടായത്.
രണ്ട് കുട്ടികളടക്കം ഏഴ് പേരാണ് കാറിലുണ്ടായിരുന്നത്. എങ്ങനെയാണ് വാഹനം നിയന്ത്രണം വിട്ടതെന്ന കാര്യത്തില് വ്യക്തതയില്ല. കുട്ടി സീറ്റിനടിയിലേക്ക് വീണുപോകുകയായിരുന്നുവെന്നാണ് വിവരം. കാറിലുണ്ടായിരുന്ന ടിനു, മെറിന്, മാത്യു, ശോശാമ്മ, ലൈസമ്മ, കിയാന് എന്നിവര്ക്ക് പരിക്കേറ്റു.
ഇവര് സഞ്ചരിച്ച കാര് നിയന്ത്രണം വിട്ട് കുറ്റിക്കല് സ്കൂളിന്റെ മതിലിലേക്ക് ഇടിച്ചാണ് അപകടമുണ്ടായത്. കുട്ടിയുടെ മൃതദേഹം തെള്ളകത്തെ സ്വകാര്യ ആശുപത്രിയില് സൂക്ഷിച്ചിരിക്കുകയാണ്. പരിക്കേറ്റവരെ പാമ്പാടി താലൂക്ക് ആശുപത്രിയില് പ്രവേശിപ്പിച്ചു. കുറ്റിക്കല് സെന്റ് തോമസ് എല്പി സ്കൂളിന്റെ മതിലിലേക്കാണ് കാര് ഇടിച്ചുകയറിയത്.
Discussion about this post