കൊല്ലം: കൊല്ലത്ത് 15കാരന് ജീവനൊടുക്കിയ സംഭവത്തില് ബന്ധുക്കളും അയല്വാസികളുമായ ദമ്പതികള് അറസ്റ്റില്. ദമ്പതികള് ഭീഷണിപ്പെടുത്തിയതിന്റെയും മര്ദിച്ചതിന്റെയും മനോവിഷമത്തിലാണ് കുട്ടി ആത്മഹത്യ ചെയ്തതെന്നാണ് മാതാപിതാക്കളുടെ പരാതിയില് പറയുന്നത്.
പത്താംക്ലാസ് വിദ്യാര്ത്ഥിയായ ആദി കൃഷ്ണന് ആണ് ജീവനൊടുക്കിയത്. സംഭവത്തില് ആത്മഹത്യാപ്രേരണക്കുറ്റം ചുമത്തി കുന്നത്തൂര് പടിഞ്ഞാറ് തിരുവാതിരയില് ഗീതു, ഭര്ത്താവ് സുരേഷ് എന്നിവരെയാണ് അറസ്റ്റ് ചെയ്തത്.
ദമ്പതികളുടെ മകള്ക്ക് ഇന്സ്റ്റഗ്രാമില് സന്ദേശം അയച്ചെന്നാരോപിച്ച് പ്രതിയായ ഗീതു ആദികൃഷ്ണന്റെ മുഖത്ത് അടിക്കുകയും ഭീഷണിപ്പെടുത്തുകയും ചെയ്തതായും ഇതിന്റെ മനോവിഷമത്തില് കുട്ടി ആത്മഹത്യ ചെയ്തെന്നുമാണ് പരാതിയില് പറയുന്നത്.
ആദികൃഷ്ണനെ കഴിഞ്ഞ ഡിസംബര് ഒന്നിനായിരുന്നു വീടിനുള്ളില് ജനല് കമ്പിയില് തൂങ്ങി മരിച്ചനിലയില് കണ്ടെത്തിയത്. ഇതുമായി ബന്ധപ്പെട്ട് അയല്വാസികളായ ദമ്പതികള്ക്കെതിരെയാണ് കുട്ടിയുടെ മാതാപിതാക്കള് പരാതി നല്കിയിരുന്നത്.
ദമ്പതികള് കോടതിയില് മുന്കൂര് ജാമ്യാപേക്ഷ നല്കിയിരുന്നു. ഇത് തള്ളിയതിനെ തുടര്ന്നാണ് ശാസ്താംകോട്ട പൊലീസ് ഇവരെ അറസ്റ്റ് ചെയ്തത്.
Discussion about this post